Hayal-qızlar isbilermenligin rawajlandırıw hám olardı ekonomikalıq jaqtan qollap-quwatlaw ÓzLiDeP jumısındaǵı áhmiyetli baǵdarlardan biri bolıp esaplanadı. Usı maqsette Nókis qalasında bir qatar ámeliy jumıslar alıp barılmaqta.

Sonıń ishinde, ÓzLiDeP Nókis qalalıq Keńesiniń deputatı Zamira Aytbaevanıń baslaması menen jergilikli isbilermenlerge ámeliy járdem kórsetilmekte. Jaqında onıń baslaması menen “Jipek jolı” MPJda shańaraqlıq mámleketlik emes mektepke shekemgi bilimlendiriw shólkemin rawajlandırıp atırǵan isbilermen Zulfiya Jumabaevaǵa jeńilletilgen kredit ajıratılıwına járdem berildi.

Bul joybar partiyanıń «Hayal-qızlar qanatı» tárepinen ámelge asırılıp atırǵan “Bunyodkor ayollar” joybarı sheńberinde ótkerildi. Alınǵan kredit qarjıları baqshanı keńeytiw, jańa mebel hám balalar ushın jataqxanalar, sonday-aq, zárúr úskeneler satıp alıwǵa qaratıldı.

Eger aldın bul baqsha 25 balaǵa tálim-tárbiya xızmetlerin kórsetken bolsa, jeńilletilgen kredit qarjıları esabınan baqsha imkaniyatları keńeytilip, jáne 25 balanı qabıl etiw imkaniyatı jaratılıp, ulıwma sanı 50 ge jetti. Sonday-aq, bul keńeyiw sebepli baqshada aymaqtaǵı 5 hayal-qız ushın jańa jumıs orınları jaratıldı.

Bul tek ǵana bilimlendiriw tarawın rawajlandırıw emes, al hayal-qızlardıń ekonomikalıq belsendiligin arttırıwda da úlken áhmiyetke iye boldı.

– Men balalar menen islesiwdi ómirimniń mazmunı dep bilemen. Aldın mektepke shekemgi bilimlendiriwde tárbiyashı bolıp, keyin máhálle basshısı boldım. Bul tájiriybe maǵan tárbiyanıń áhmiyetin jaqsı úyretti. Hár bir balaǵa mehir hám durıs tálim beriw – keleshekti qurıw degen sóz. Sol sebepli baqashamızdı rawajlandırıp, sapalı bilimlendiriw orayına aylandırmaqshıman, – deydi baqsha baslıǵı, isbilermen hayal Jumabaeva Zulfiya

Nókis qalasındaǵı bul baslama – hayal-qızlardı qollap-quwatlawda ámelge asırılıp atırǵan áhmiyetli qádem bolıp esaplanadı.

Qaraqalpaqstan xabar agentligi