Qaraqalpaqstan Respublikası Densawlıqtı saqlaw ministri M.Qurbonov Hindstannıń iri jeke menshik joqarı bilimlendiriw mákemelerinen biri – ERA Universiteti wákilleri menen ushırasıw ótkerdi.

ERA universiteti wákilleri dáslep Qaraqalpaqstan medicina institutında jaratılǵan sharayatlar, institut sistemasındaǵı simulyaciyalıq oray, klinikalardıń jumısı menen jaqınnan tanıstı.
Bunnan soń Qaraqalpaqstan medicina institutı hám ERA universitetiniń keleshektegi óz-ara birge islesiwin nátiyjeli shólkemlestiriw, institut xızmetkerleriniń konferenciya, seminar hám stajirovka baǵdarlamalarında qatnasıwın támiyinlew, xalıqaralıq dárejedegi ilimiy maqalalardı basıp shıǵarıw, ERA universitetiniń 3D animaciyalıq formattaǵı oqıw metodikasın engiziw boyınsha eki tárepleme memorandumǵa qol qoydı.
Sonday-aq, sapar dawamında delegaciya aǵzalarınıń Qaraqalpaqstan Respublikası Ministrler Keńesi Baslıǵınıń orınbasarı B.Otemuratov penen ushırasıwı bolıp ótti. Ushırasıw dawamında respublikamızda medicinalıq bilimlendiriwdi rawajlandırıw hám óz-ara tájiriybe almasıwdan ibarat máseleler dodalanıp, Ministrler Keńesi Baslıǵınıń orınbasarı birge islesiw baylanısların bekkemlew hám perspektivalı joybarlardı qollap-quwatlawǵa tayar ekenin atap ótti.
Ushırasıw sońında tárepler keleshekte birge islesiw baǵdarların belgilep aldı.

Qaraqalpaqstan xabar agentligi