Mámleketlik xızmetler orayları jańadan shólkemlestirilgen 2017-jılı 37 túrdegi xızmet kórsetilgen bolsa, házirgi waqıtta olardıń sanı 467 ge jetti. Birden-bir interaktiv mámleketlik xızmetler portalı arqalı kórsetilip atırǵan xızmetler sanı bolsa 771 di quramaqta.

Keliwshiler ushın qolaylı, kórkem bolǵan 208 zamanagóy hám innovaciyalıq mámleketlik xızmetler orayları jumıs alıp barmaqta. 200 ge shamalas máhállede 24/7 tártibinde isleytuǵın interaktiv kiosklar ornatılıp, olar arqalı 60 qa shamalas mámleketlik xızmet kórsetiw jolǵa qoyıldı.
Mámleketlik xızmetlerdiń paydalanıwshı ushın qolaylı túrlerin (user-friendly) jolǵa qoyıw, artıqsha áweregershiliktiń aldın alıw hám aralıqtan turıp mámleketlik xızmetlerden paydalanıw imkaniyatı keńeytildi. 21 túrdegi mámleketlik xızmetti “proaktiv”, 68 in “kompozit” túrlerde hám 26 sın avtomatlastırılǵan tártipte kórsetiw jolǵa qoyıldı. 200 ge shamalas mámleketlik xızmet “3 qádem” hám “paydalanıwshı ushın beyimlestirilgen” principleri tiykarında ápiwayılastırıldı.
Álbette, bul taraw boyınsha da adamlardı oylandırıp atırǵan máseleler joq emes. Máselen, ayırım xızmetlerdiń bahaları xalıq ushın qolaylı emes.
Sonı esapqa alıp, xızmetler bahasın minimallastırıw ilajları kórilmekte. Mısal ushın, eger mámleketlik xızmetten, sonıń ishinde, licenziya, ruqsatnama alıw, mámleketlik dizimnen ótiw hám basqa da xızmetlerden paydalanıw ushın Birden-bir interaktiv mámleketlik xızmetler portalı (BIMXP – my.gov.uz) yamasa onıń mobil qosımshası arqalı múrájat etilse, belgilengen mámleketlik bajı, jıyımlar hám basqa da tólemlerdi ámelge asırıwda on procent shegirme beriledi.
Yaǵnıy, belgili bir xızmetten paydalanıw ushın mámleketlik xızmetler orayları (MXO) yamasa wákillikli uyımlarǵa tikkeley múrájat etilgende, tiyisli tólemler tolıq óndiriledi.
Xızmetten paydalanıw ushın BIMXP arqalı múrájat etilgende bolsa usı tólemlerdiń hár birin 90 procent muǵdarındaǵı shegirmeler menen ámelge asırıw imkaniyatı bar.
Sonıń ishinde, “Mámleketlik bajı haqqında”ǵı nızamnıń 22-1-statyasına bola, hár qanday mámleketlik xızmetti alıw, sonıń ishinde, licenziya, ruqsatnama alıw, mámleketlik dizimnen ótiw hám basqa da xızmetler ushın Ózbekstan Respublikası Birden-bir interaktiv mámleketlik xızmetler portalı arqalı erkin túrde múrájat etilgende mámleketlik bajı, jıyımlar hám basqa da tólemler mámleketlik xızmetler orayları arqalı yamasa xızmet kórsetiwshi uyımlarǵa tikkeley múrájat etilgende tólenetuǵın summanıń 90 procenti muǵdarında óndiriledi.
Bunnan tısqarı, BIMXP yamasa onıń mobil qosımshası arqalı múrájat etilgende, tikkeley MXO yamasa wákillikli uyımlarǵa múrájat etilgende, tólenetuǵın tólemli xızmetler ushın tólemler ámelge asırılmaydı.
BIMXPtıń qosımsha abzallıqları sonda, sistema úzliksiz hám gezeksiz 24/7 rejiminde isleydi. Bir orında 700 den aslam mámleketlik xızmet hám qosımsha servislerden paydalanıw múmkin. Bir jerde toplanǵan 10 nan artıq jeke maǵlıwmatlar menen tanısıw hám paydalanıw múmkin. Bulardıń hámmesi úyden yamasa jumıs ornınan sırtqa shıqpastan ámelge asırıladı. Xızmetler ushın tólemlerdi aralıqtan turıp tólew imkaniyatı bar. Artıqsha sergizdanlıqtıń aldı alınadı hám úyme-úy júriwge zárúrlik qalmaydı.
Hújjetler QR-kod penen rásmiy statusqa iye halda qáliplestiriledi hám isenimli qorǵaladı. 1242 qısqa telefon nomeri hám jasalma intellekt tiykarındaǵı operator, sonday-aq, janlı operator arqalı 24/7 rejimindegi qollap-quwatlaw xızmeti bar.
Mámleketlik xızmetler orayları arqalı 2023-jılı 8,8 million, 2024-jılı 12,3 million, 2025-jıldıń 6 ayında 12,7 million, my.gov.uz arqalı 2023-jılı 22,6 million, 2024-jılı 33,7 million, 2025-jıldıń 6 ayında 20,7 million mámleketlik xızmet kórsetilgen.
Ortasha xızmet kórsetiw waqtı 2023-jılı 15 minuttı quraǵan bolsa, 2024-jılı bul kórsetkish 10, 2025-jılı 4 minuttı quramaqta.
Mámleketlik xızmetler orayları arqalı kórsetilip atırǵan xızmetlerdiń tabıslı kórsetiliwi nátiyjesinde Ózbekstan “Biznesti dizimnen ótkeriw” kórsetkishi boyınsha dúnyada 8-orındı iyelegen.

Norgul Abduraimova, ÓzA