Qaraqalpaqstan Respublikası sudınıń baslaması menen Joqarǵı sud Plenumınıń 2025-jıl 23-iyundaǵı «Ekonomikalıq sudlar tárepinen «Tólewge qábiletsizlik haqqında»ǵı Ózbekstan Respublikası Nızamı normaların qollanıwdıń ayırım máseleleri haqqında»ǵı Qararın dodalawǵa baǵıshlanǵan seminar shólkemlestirildi.

Ilajda ekonomikalıq isler boyınsha sudyalar, sud basqarıwshıları hám tiyisli taraw wákilleri qatnastı. Seminarda Qaraqalpaqstan Respublikası sudı baslıǵınıń orınbasarı, ekonomikalıq sudlaw kollegiyası baslıǵı B,Ktaybekov shıǵıp sóylep, Plenum qararınıń ámeliy áhmiyetin tereń talqılap, tólewge qábiletsizlik processlerin durıs hám birdey ámeliyat tiykarında kórip shıǵıwdıń áhmiyetine itibar qarattı. Atap ótilgenindey, Joqarǵı sud Plenumınıń qararı ekonomikalıq sudlar ámeliyatı ushın áhmiyetli huqıqıy dárek sıpatında xızmet etedi. Onda belgilengen túsinikler hám usınıslar sud ámeliyatında nızamlılıqtı támiyinlewge xızmet etedi.
-Plenum qararına bola, sudlar endi tólewge qábiletsizlik jaǵdaylarında kárxananıń finanslıq jaǵdayın tereń tallaw, sud basqarıwshılarınıń rolin anıq belgilew, kreditorlardıń huqıqların támiyinlew hám tártip-qaǵıydalardı nızamshılıqqa muwapıq halda júrgiziwge ayrıqsha itibar qaratadı,-deydi Beruniy rayonlararalıq ekonomikalıq sudınıń sudyası Baqbergen Ubaydullaev.
Seminarda qatnasıwshılar ámeliy jaǵdaylar tiykarında jańa kózqaraslardı dodalap, sud qararlarınıń nızamlı, tiykarlı hám ádil bolıwında joqarıda keltirilgen Plenum qararı úlken áhmiyetke iye ekenligin atap ótti.
Ilaj juwmaǵında ámeliyatta birdey kózqarastı qáliplestiriw, is júrgiziwde ashıq-aydınlıq hám qalıslıqtı támiyinlew, sonday-aq, tólewge qábiletsizlik boyınsha nızam normaların durıs talqılaw boyınsha pikir-usınıslar tiykarında anıq wazıypalar belgilep alındı.

Gúlayım Ǵanieva
Qaraqalpaqstan Respublikası sudınıń bas konsultantı.
Qaraqalpaqstan xabar agentligi