Ózbekstan Respublikası Prezidentiniń 2024-jıl 23-sentyabrdegi «Kámbaǵallıqtan abadanlıqqa qaray baǵdarlamasın ámelge asırıw boyınsha birinshi gezektegi ilajlar haqqında»ǵı qararında belgilengen wazıypalardıń orınlanıwın támiyinlew maqsetinde respublikamızda kóplegen iygilikli isler ámelge asırılmaqta.

Ámiwdárya, Shımbay hám Tórtkúl rayonlarında ashılǵan «Dáslepki rawajlanıw orayları»n da usınday jumıslardıń bir kórinisi desek boladı.
Shımbay rayonındaǵı Kónshi mákán puqaralar jıyınında shólkemlestirilgen «Dáslepki rawajlanıw orayı»nıń ashılıw máresimine Shımbay rayonı hákimi Aybek Tajetdinov qatnasıp, barlıq ilaj qatnasıwshıların jańa bilimlendiriw shólkeminiń ashılıwı menen qutlıqladı. Ilajda atap ótilgenindey, Ózbekstan Respublikası Prezidentiniń basshılıǵında mámleketimizdiń barlıq aymaqları sıyaqlı, Shımbay rayonında da iri ózgeris hám jańalanıwlar júz bermekte. Jańa mektepler hám balalar baqshaları boy tiklep, olardıń materiallıq-texnikalıq bazası bekkemlenbekte. Berdaq atındaǵı Qaraqalpaq mámleketlik universitetiniń Shımbay fakulteti shólkemlestirilip, onda respublikamız jasları zaman talabına say bilim almaqta.
– Oraylarǵa aymaqlardıń mútájliginen kelip shıǵıp, mektepke shekemgi bilimlendiriwge qamtıp alınbaǵan balalardı, sonıń ishinde, ayrıqsha bilimlendiriwge mútájlikleri bar bolǵan balalardı, birinshi gezekte «Kámbaǵal shańaraqlar reestri»ne kirgizilgen shańaraqlardıń perzentleri qamtıp alınadı,-deydi rayonlıq Mektepke shekemgi hám mektep bilimlendiriwi bóliminiń baslıǵı Mámbetsayd Jaqsımov.- Oǵan dáslep 200 bala qamtıp alınıp, sabaq processleri 2 mezgilde 4 saattan alıp barıladı. Sonıń ishinde, 3-6 jastaǵı balalar ushın «oyın toparları», 2-7 jastaǵı ayrıqsha bilimlendiriwge mútájlikleri bolǵan balalar ushın «arnawlı mektepke shekemgi bilimlendiriw xızmeti» jolǵa qoyıladı.
Húrmetli Prezidentimizdiń bul qararı járdemge mútáj shańaraqlardıń perzentlerin biypul mektepke shekemgi bilimlendiriwge qamtıp alıw, olardıń keleshektegi turmısına bekkem tiykar jaratıw jolındaǵı áhmiyetli qádemlerden biri bolıp esaplanadı. Bunday oraylar hár bir rayon hám qalada basqıshpa-basqısh jolǵa qoyıladı.

Adilbay Orazov,
Qaraqalpaqstan xabar agentligi sholıwshısı.