Qanlıkól rayonındaǵı «Agrohamkor cluster» JShJ jaqın kúnlerde jańa paxta tazalaw zavodın iske qosıw aldında.
2024-jılda jumıs baslaǵan jámiyet bıyıl 139 fermer xojalıǵı menen shártnama dúzgen bolıp, paxta jıyın-terimi máwsiminiń baslanıwı menen fermer xojalıqları paxta tapsırıwdı basladı.

Búgingi kúnde «Agrohamkor cluster» JShJ da 50 adam jumıs penen támiyinlengen bolsa, paxta tazalaw zavodı iske túskennen soń jáne 100 jańa jumıs ornınıń jaratılıwı názerde tutılǵan. Kelesi jılı maydı qayta islew zavodınıń ashılıwı menen bul san eki esege artıwı kútilmekte.
Óndiris cexları, qoymaxanalar, laboratoriyalar qurılıp, paxta tazalaw úskeneleri jańalandı. Zavodta sırt ellerden alıp kelingen zamanagóy texnologiya tiykarında paxtanı qayta islew jolǵa qoyıladı. Nátiyjede bir tonna paxtanı qayta islew ushın aldıńǵı kórsetkishten 15-20 procentke az, yaǵnıy 280-300 kVt elektr energiyası sarıplanıwı kútilmekte. Paxtanı qabıllaw, tazalaw, keptiriw, shigitten talshıǵın ajıratıw, taylaw jumısları bir imaratta ámelge asırıladı. Alınatuǵın talshıq hám mamıqtıń sapası aldıńǵılardan sezilerli dárejede joqarı boladı.

Qaraqalpaqstan xabar agentligi