Ámiwdárya rayonı Mektepke shekemgi hám mektep bilimlendiriwi bólimi janında shólkemlestirilgen oraydıń ashılıw máresimine Qaraqalpaqstan Respublikası Mektepke shekemgi hám mektep bilimlendiriwi ministri Gúlistan Kojabaeva, rayon hákimi Sobir Xojametov hám basqalar qatnasıp, oraydıń keleshektegi jumıslarına rawaj tiledi.

– Oraydıń tiykarǵı wazıypası – mektepke shekemgi bilimlendiriw sistemasına ele qamtıp alınbaǵan balalardı, atap aytqanda, «Kámbaǵallıq reestri»ne kirgizilgen shańaraq perzentlerin hám imkaniyatı sheklengen 2-7 jastaǵı balalardı biypul bilimlendiriw procesine tartıwdan ibarat, -deydi rayonlıq Mektepke shekemgi hám mektep bilimlendiriwi bólimi baslıǵı Yalǵash Shamuratov.
Zamanagóy túrde úskenelengen oray balalardıń sapalı bilim alıwı ushın jaqtı hám qolaylı klasslar, zárúrli oqıw-metodikalıq qurallar menen tolıq támiyinlengen bolıp, keń jáne qáwipsiz oyın maydanshaları olardıń zawıqlanıp oynawına imkan beredi.
Dáslep 240 bala orayǵa qamtıp alınıp, bilimlendiriw procesleri 2 smenada 4 saattan alıp barıladı. Sonday-aq, inklyuziv bilimlendiriw sisteması jolǵa qoyılıp, ayrıqsha kútimge mútáj balalar ushın óz úyinde individiual bilimlendiriw shólkemlestiriledi.

Qaraqalpaqstan xabar agentligi