Ózbekstan Respublikası Prezidentiniń tapsırmasına bola «Ózbasımshalıq penen iyelep alınǵan jer uchastkalarına hám de olarda qurılǵan imaratlar menen qurılmalarǵa bolǵan huqıqlardı tán alıw haqqında»ǵı Nızam qabıl etilgen edi.

Nızam menen puqaralar hám isbilermenlerdiń múlkke bolǵan huqıqları tán alınıwı, puqaralar arasındaǵı múlkshilik, sonday-aq, miyraslar menen baylanıslı dawlarǵa sheshim tabılıwına tiykar jaratıldı. Bunnan tısqarı, xalıqtıń sociallıq máseleleri (turaqlı dizimge qoyıw, materiallıq járdem alıw, mektep, baqshaǵa jaylastırıw) hám imarat jáne obektlerdi kommunal tarmaqlarǵa jalǵaw boyınsha máselelerine de unamlı sheshim tabılatuǵın boldı.
Usı nızamnıń 20-statyası tiykarında Ózbekstan Respublikası Ekonomika hám qarjı ministrligi janındaǵı Kadastr agentliginiń “E’tirof” avtomatlastırılǵan málimleme sisteması arqalı kelip túsken ózbasımshalıq penen iyelep alınǵan jer uchastkalarına hám olarda qurılǵan imaratlar hám qurılmalarǵa bolǵan huqıqlardı tán alıw boyınsha toplanǵan hújjetler kórip shıǵıldı.
Qaraqalpaqstan Respublikası Joqarǵı Keńesi Prezidiumınıń qararı menen Nókis qalası, Ámiwdárya, Beruniy, Ellikqala, Kegeyli, Qanlıkól, Tórtkúl, Taqıyatas, Shımbay, Qońırat, Qaraózek, Taxtakópir hám Nókis rayonlarındaǵı 200 turaq jay iyeleriniń ózbasımshalıq penen hám artıqsha iyelegen jerlerine, olarda qurılǵan turaq jaylarına ijara hám múlk huqıqları tán alındı.
Maǵlıwmat ushın aytatuǵın bolsaq, bunnan aldın usı nızam menen búgingi kúnge shekem respublikamız boyınsha 291 turaq jay iyeleriniń ijara hám múlk huqıqları tán alınǵan edi.

Qaraqalpaqstan xabar agentligi