Ózbekstanda mámleketlik puqaralıq xızmetin jańa basqıshqa alıp shıǵıw jolında reformalar izbe-iz dawam etpekte. 2022-jıl 10-noyabrden kúshke kirgen “Mámleketlik puqaralıq xızmeti haqqında”ǵı Nızam bul baǵdardaǵı áhmiyetli qádemlerden biri boldı.

Nızamǵa bola, mámleketlik xızmetkerler ushın anıq huqıq hám minnetlemeler belgilendi, sonıń menen birge olardıń máplerin qorǵawdıń jańa huqıqıy mexanizmleri engizildi.
Sonıń ishinde, eger mámleketlik uyım qabıl etken qarar nızamǵa qayshı bolsa yamasa lawazımlı shaxstıń háreketi (yamasa háreketsizligi) nátiyjesinde xızmetkerdiń huqıqları buzılsa, ol endi qol qawsırıp otırıwı shárt emes. Nızam xızmetkerge úsh joldan birin tańlaw imkaniyatın beredi. Yaǵnıy, ol joqarı turıwshı mámleketlik uyımǵa shaǵım etiw, arnawlı wákillikli mámleketlik uyımǵa múrájat etiw, sud arqalı óz huqıqın talap ete aladı.
Ásirese, “Hákimshilik sud islerin júrgiziw haqqında”ǵı Kodeks mámleketlik xızmetkerler ushın úlken imkaniyat ashadı. Bul kodeks arqalı xızmetker óz huqıq hám máplerin sudta qorǵawı múmkin.
Ózbekstan Respublikası Prezidentiniń 2025-jıl 15-iyundegi PP-95-sanlı Pármanı menen mámleketlik xızmetkerler lawazımlarınıń birden-bir reestri tastıyıqlandı. Bul bolsa xızmet sistemasın jáne de ashıq hám nátiyjeli etiwge xızmet etedi.
Mámleketlik xızmetker endi óz huqıqların qorǵay alatuǵın tolıq mexanizmge iye. Bul, bárinen burın, ádil hám nátiyjeli mámleketlik xızmetti qáliplestiriw, xızmetkerlerdiń juwapkershiligin hám jumısqa qızıǵıwshılıǵın arttırıwǵa xızmet etedi.

Kamalatdin Xojamuratov,
Qaraqalpaqstan Respublikası hákimshilik sudınıń sudyası.
Qaraqalpaqstan xabar agentligi