Sońǵı jılları xalqımızdıń kitap oqıwǵa bolǵan qızıǵıwshılıǵı jıldan-jılǵa artıp barmaqta. Sonlıqtan elimizde kitapqumarlar tárepinen súyip oqılatuǵın shıǵarmalardı qayta basıp shıǵarıw hám dúnyadaǵı belgili kitaplardı ana tilimizge awdarıw jumısları turaqlı jolǵa qoyılmaqta.

Jaqında “Plato books”, “Booky”, “Atiyaj” JShJ lar hám “Aydınlar” joybarı tárepinen finanslıq sawatlılıq boyınsha qaraqalpaq tiline awdarılǵan dúnya kóleminde bestsellerge aylanǵan kitaplar basıp shıǵarıldı. Sonıń ishinde, Bodo Sheferdiń “Pul álipbesi”, Jorj S. Kleysonnıń “Vavilonnıń eń bay adamı”, Saidmurad Davlatovtıń “Men hám pul” hám “Pikirlew strategiyası” kitapları kóp nusqada basıp shıǵarıldı.
Usı kitaplardı keń jámiyetshilikke tanıstırıw maqsetinde, Ájiniyaz atındaǵı Nókis mámleketlik pedagogikalıq institutında finanslıq sawatlılıq boyınsha qaraqalpaq tiline awdarılǵan bestseller kitaplardıń prezentaciyası bolıp ótti.
Ilaj Qaraqalpaqstan Respublikası Joqarǵı Keńesi hám Ministrler Keńesi, Jaslar isleri agentligi Qaraqalpaqstan Respublikası basqarması, sonday-aq, “Plato books”, “Booky” hám “Kaypanov” JShJ tárepinen birgelikte shólkemlestirildi.
Keshege student-jaslar, jazıwshılar, respulikamızdaǵı málimleme-kitapxana oraylarınıń xızmetkerleri hám ǵalaba xabar quralları wákilleri qatnastı.
Ilajda Ájiniyaz atındaǵı Nókis mámleketlik pedagogikalıq institutınıń prorektorı Q. Qodirov, sociologiya ilimleri boyınsha filosofiya doktorı R. Saparbaevlar sońǵı jılları elimizde Prezidentimizdiń basshılıǵında jaslar arasında kitapqumarlıqtı rawajlandırıw boyınsha islenip atırǵan ilajlarǵa joqarı baha berip, búgingi jańa kitaplardıń tanıstırıw keshesi bul islerdiń ayqın dáliyli ekenligin atap ótti.
Keshede isbilermen Azamat Kaypanov “Men hám pul” hám “Pikirlew strategiyasi” kitaplarınıń prezentaciyasın ámelge asırdı.
“Booky” joybarınıń tiykarın salıwshısı Azizbek Dabılov “Aydınlar” joybarı haqqında prezentaciya isledi.
Baǵdarlama dawamında qatnasıwshılar menen soraw-juwaplar ótkerildi. Eń jaqsı soraw iyeleri shólkemlestiriwshiler tárepinen kitap vaucherleri hám sawǵalar menen sıylıqlandı.
-Kitapqumarlardıń talap hám mútájligin qanaatlandırıw maqsetinde, basqa tillerde jazılǵan belgili shıǵarmalardı qaraqalpaq tiline awdarıw, burın basıp shıǵarılǵan shıǵarmalardı qayta basıp shıǵarıw hám keńnen tarqatıw jumısları dawam ettirilmekte. “Plato books” hám “Booky” qaraqalpaq tilindegi audiokitaplar platforması hám “Aydınlar” joybarı tárepinen francuz jazıwshısı Antuan de Sent-Ekzyuperidiń “Kishkene shahzada” kitabı qaraqalpaq tilinde 2000 nusqada basıp shıǵarıldı hám kitapqumarlar tárepinen jıllı kútip alındı,-deydi Azizbek Dabılov.-Sonday-aq, Qaraqalpaqstan xalıq jazıwshısı, Berdaq atındaǵı Mámleketlik sıylıqtıń laureatı Karamatdin Sultanovtıń “Ájiniyaz” romanı qayta basıp shıǵarıldı. Bul shıǵarma xalqımız arasında súyip oqılatuǵın romanǵa aylanǵan. Bunnan tısqarı, qaraqalpaq tilinde 20 ǵa shamalas shıǵarma zamanagóy usılda qayta basıp shıǵarıldı. Jaqın kúnlerde basqa kitaplardıń da prezentaciyaları ótkeriliwi rejelestirilgen.
-Húrmetli Prezidentimiz Sh.Mirziyoev tárepinen alǵa qoyılǵan “Bes baslama” joybarınıń tórtinshi baslaması jaslardı kitapqumarlıqqa qızıqtırıw hám baǵdarlawǵa qaratılǵan,-deydi Jaslar isleri agentligi Qaraqalpaqstan Respublikası basqarmasınıń bólim baslıǵı Ǵayratdin Seytekov- Búgingi prezentaciya da usı baslamanıń ámeliy kórinisi bolıp, jaslardıń ilim hám aǵartıwshılıqqa bolǵan qızıǵıwshılıǵın kúsheytiwge xızmet etedi. “Ziyrek kitapqumar”, “Jas kitapqumar”, “Jas kitapqumar shańaraq”, “Zakovat” intellektuallıq tańlawları da bir maqset jolında birlesip, jaslardı kitap oqıwǵa shaqırıw, bilimge umtılıw hám pikirlewdi rawajlandırıwǵa úles qospaqta.
Haqıyqatında da, qaraqalpaq tiline bestseller shıǵarmalardıń awdarılıwı, qayta basıp shıǵarılıwı, audiokitaplar hám keleshekte film variantlarınıń tayarlanıwı jaslar arasında kitapqumarlıqtı rawajlandırıwǵa, milliy ádebiyatımız hám mádeniyatımızdı jańa basqıshqa alıp shıǵıwǵa xızmet etedi.

Adilbay Orazov,
Qaraqalpaqstan xabar agentligi sholıwshısı.