Qaraózek rayonı Jaslar orayında «Sudya hám jaslar ushırasıwı» bolıp ótti. Ushırasıwda Nókis rayonlar aralıq hákimshilik sudınıń sudyası A.Saliev hám Qaraózek rayonı prokurorınıń járdemshisi E.Sadullaev qatnasıp, jaslar menen ashıq pikirlesti.

Ilajda sudya tárepinen jaslarǵa keyingi jıllarda sud-huqıq tarawında ámelge asırılıp atırǵan reformalar, atap aytqanda, 2025-jıl 11-martta qabıl etilgen «Xalıqqa sud dodalawlarında aralıqtan turıp qatnasıw ushın jáne de qolaylı sharayatlar jaratılıwı múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı Nızam haqqında túsinikler berildi. Nızam menen puqaralardıń sudlarǵa onlayn tárizde múrájat etiwi hám aralıqtan qatnasıwı ushın jaratılǵan qolaylıqlar keńnen sáwlelendirildi.
Sonday-aq, ushırasıwda Ózbekstan Respublikası Prezidentiniń 2025-jıl 21-avgustta qabıl etilgen “Sudlar jumısına jasalma intellekt texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı qosımsha ilajlar haqqında»ǵı PP-140-sanlı Pármanınıń áhmiyeti haqqında sóz etildi.
Pármanda sudlardıń jumısına jasalma intellekt hám zamanagóy sanlı texnologiyalardı engiziw, sud islerin júrgiziwde avtomatlastırıwdı bunnan bılay da rawajlandırıw, sudyalardıń jumısın jeńilletiw hám ádil sudlawdıń ashıq-aydınlıǵın támiyinlewge qaratılǵan tiykarǵı wazıypalar belgilengen. Sonıń menen birge, sud imaratların zamanagóy úskeneler menen támiyinlew, materiallıq-texnikalıq támiynattı jaqsılaw arqalı puqaralar ushın múnásip sud ortalıǵın jaratıw da názerde tutılǵan.
Ótkerilgen ilaj dawamında kóshpeli sud májilisi shólkemlestirildi. Onda jınayatshılıq hám huqıqbuzarlıqtıń awır aqıbetleri, jaslar arasında ushırasıp atırǵan hár qıylı nızambuzıwshılıq jaǵdayları haqqında turmıslıq mısallar keltirilip, bul arqalı olar ámeliyat arqalı nızamnıń ústinligi, jaza belgilengeni hám ádil sudlaw túsiniklerin jáne de tereńirek ańladı.

Qaraqalpaqstan xabar agentligi