Mámleketimizde xalıqtıń turmıs dárejesin arttırıw, kámbaǵallıqtı qısqartıw hám jańa dáramat dáreklerin jaratıwǵa qaratılǵan keń kólemli reformalar izbe-iz dawam etpekte. Ásirese, kámbaǵal hám sociallıq járdemge mútáj shańaraqlardı qollap-quwatlaw, olardı kishi isbilermenlikke tartıw baǵdarında ámeliy jumıslardıń isleniwi jaqsı nátiyjeler menen kózge taslanbaqta.

Bul baǵdardaǵı jumıslar Taqıyatas rayonında da shólkemleskenlik penen alıp barılmaqta. Ásirese, qusshılıqtı rawajlandırıw baǵdarındaǵı ámeliy ilajlar tiykarında búgingi kúnde shóje alǵan shańaraqlardıń kópshiligi máyek hám gósh jetistiriwdi baslap, azıq-awqat támiynatın jaqsılap ǵana qalmastan, artıqsha ónimdi bazarǵa shıǵarıp satpaqta. Bul bolsa shańaraqlardıń qosımsha dáramat tawıp, shańaraqtaǵı ekonomikalıq erkinlikke alıp kelmekte. Ayırım belsendi shańaraqlar bolsa óz jumısın keńeytip, qusshılıqtı kishi biznes dárejesine alıp shıǵıwǵa umtılmaqta.
Usı jumıslar qatarında rayonda qáwender shólkemler menen birgelikte “Jayxun” máhállesindegi kámbaǵal shańaraqlarǵa shóje tarqatıw jumısları shólkemlestirildi.
– Mámleketimizde alıp barılıp atırǵan «Kámbaǵallıqtan abadanlıqqa qaray» baǵdarlaması tiykarında kámbaǵallıq reestrında turǵan shańaraklardı qáwenderligine alǵan mákeme, kárxanalardıń shólkemlestiriwi menen járdemge mútáj, kem támiyinlengen shańaraqlarǵa ámeliy járdemler berilip kelinbekte. Kúni keshe usınday shańaraqlarǵa júz shójeden tarqatılıp berildi. Bul álbette, olardıń shańaraqlıq finans jaǵdayın jaqsılap, abadan turmıs keshiriwine tiykar jaratadı,-deydi hákim járdemshisi A.Qudaybergenov.

Qaraqalpaqstan xabar agentligi