Nókis mámleketlik texnika universitetinde «InnoWeek-2025: Ilimiy qollanbalar kórgizbesi hám startaplar festivalı» bolıp ótti.

Ózbekstan hám Qaraqalpaqstan Respublikaları mámleketlik gimnleri menen baslanǵan ilajdı Nókis mámleketlik texnika universiteti Ilimiy isler hám innovaciyalar boyınsha prorektorı M.Artıqbaev ashıp berdi.
Ilajda Qaraqalpaqstan Respublikası Joqarı bilimlendiriw, ilim hám innovaciyalar ministrligi sektor baslıǵı J.Oserbaev, Nókis mámleketlik texnika universiteti Registrator ofisi baslıǵı R.Oteniyazovlar shıǵıp sóylep, qatnasıwshılarǵa áwmetler tiledi.
Onda “InnoWeek-2025» sıyaqlı bir qatar joybarlarda belsene qatnasıp kiyatırǵan Nókis mámleketlik texnika universitetiniń magistrantı, “Zulfiya” sıylıǵınıń iyesi B.Tureniyazova qatnasıwshılarǵa joybar, onda qatnasıw talapları, jeńiske erisiw ushın qaysı táreplerge ayrıqsha itibar qaratılıwı kerek ekenligi haqqında maǵlıwmat berip ótti.
Bunnan soń Ózbekstan mámleketlik kórkem óner hám mádeniyat institutı Nókis filialı studentleriniń muzıkalıq shıǵıwları jıynalǵanlardıń itibarına usınıldı.
Tóreshiler quramı aǵzaları hár bir qatnasıwshınıń joybarı menen tanısıp, ózlerin qızıqtırǵan sorawlarǵa joybar avtorlarınan juwap aldı. Olardı bahalawda joybardıń áhmiyetliligi, ámeliyatqa engizilgenlik dárejesi sıyaqlı bir qatar táreplerge itibar qaratıldı.
60 tan aslam joybarlar arasında tamshılatıp suwǵarıw sistemasın avtomatlastırıw, bilimlendiriwdiń sapasın qadaǵalawda insan faktorın azaytıw sıyaqlı maqsetlerge baǵdarlanǵan joybarlar hámmede birdey qızıǵıwshılıq oyattı.
Sıylıqlaw máresimi aldınan Qaraqalpaqstan Respublikası Joqarı bilimlendiriw, ilim hám innovaciyalar ministrligi sektor baslıǵı J.Oserbaev, Nókis mámleketlik texnika universiteti Ilimiy isler hám innovaciyalar boyınsha prorektorı M.Artıqbaev, Berdaq atındaǵı Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdımambetov, Qaraqalpaqstan awıl xojalıǵı hám agrotexnologiyalar institutı Ilimiy isler hám innovaciyalar boyınsha prorektorı w.w.a. A.Sayımbetovlar shıǵıp sóylep, barlıq innovator hám startaperlerge qatnasqanı ushın minnetdarshılıq bildirdi.
Ilajda “InnoWeek-2025» innovaciyalıq ideyalar hápteliginde qatnasıw jollamasın qolǵa kirgizgen 20 joybardıń avtorları, joqarı oqıw orınları Qaraqalpaqstan Respublikası Joqarı bilimlendiriw, ilim hám innovaciyalar ministrligi tárepinen Minnetdarshılıq xatı menen sıylıqlandı.
Sonday-aq, barlıq qatnasıwshılarǵa Nókis mámleketlik texnika universiteti atınan minnetdarshılıq xatları tapsırıldı.

Adilbay Orazov,
Qaraqalpaqstan xabar agentligi sholıwshısı