Búgin Ózbekstan máhálleleri associaciyası Qaraqalpaqstan Respublikası basqarmasında Nókis qalasındaǵı máhálle baslıqlarınıń qatnasıwında oqıw-seminarı shólkemlestirildi.

Onda Ózbekstan máhálleleri associaciyası Qaraqalpaqstan Respublikası basqarması baslıǵı S.Turmanov, awqamnıń juwapker xızmetkeri S.Kurbankulov hám Nókis qalası hákiminiń birinshi orınbasarı M.Qannazarov qatnastı.

Seminarda «máhálle jetiligi» aǵzalarınıń jumısın nátiyjeli shólkemlestiriw hám olardıń mámleketlik uyımlar, jámiyetlik shólkemler, xalıq deputatları keńesleri menen óz-ara birge islesiwin sistemalı jolǵa qoyıw, jumıssız xalıqtıń bántligin támiyinlew hám kámbaǵallıqtı qısqartıw boyınsha jıl juwmaǵı, 2026-jıldaǵı tiykarǵı wazıypalar, sonday-aq, qáwipsiz máhálle ortalıǵın jaratıw, «sanlı máhálle» platforması, máhálleniń finanslıq imkaniyatların arttırıw sıyaqlı baǵdarlarda kónlikpeler berildi.

Sonıń menen birge, máhálle baslıǵınıń jaslar tárbiyasındaǵı ornı, kem támiyinlengen hám járdemge mútáj puqaralarǵa sociallıq xızmet kórsetiwde ashıq-aydınlıq máselelerine de áhmiyet qaratıldı.

Seminar juwmaǵında máhálle baslıqları óz-ara pikir alısıp, juwapkerlerden ózlerin qızıqtırǵan sorawlarına juwap aldı.

Seminar 11-sentyabr kúni barlıq rayonlardaǵı máhálle baslıqları ushın dawam etedi.

Qaraqalpaqstan xabar agentligi