Franciya Prezidenti Emmanuel Makron keshe keshte qorǵanıw ministri Sebasten Lekornyudi mámlekettiń jańa Bas ministri etip tayınladı.

Xabarıńız bar, húkimettiń burınǵı basshısı Fransua Bayru isenim dawısın joyıttı. Onıń 2026-jılǵa mólsherlengen byudjet rejesi, sonıń ishinde, qárejetti 44 milliard evroǵa shekem qısqartıw hám mámlekettiń eki bayramın biykarlaw usınısları parlamentte keskin sınǵa alındı.
Bayrudıń basqarıw dáwirinde byudjet deficiti jalpı ishki ónimniń 5,8 procentine jetti, mámleket qarızı 3,3 trillion evrodan astı.
Qullası, Francua francuzlardıń isenimin aqlay almadı. Bunıń ústine mámlekettegi ekonomikalıq turaqsızlıq sebepli xalıqtıń narazılıǵı arttı.
Jańadan tayınlanǵan 39 jasar Sebasten Lekornyu Makron húkimetiniń tájiriybeli aǵzası esaplanadı. Bul tayınlaw arqalı finanslıq reforma procesinde siyasiy turaqlılıqtı támiyinlew maqset etilgen.
Tábiyǵıy, bul qarardıń ózin qay dárejede aqlawı jańa Bas ministrdiń ámeliy jumıslarına baylanıslı.

ÓzA