Mekteplerde oqıwshılardıń qızıǵıwshılıǵı hám qábiletin qollap-quwatlaw arqalı balalardıń jańa qırların ashıw múmkin. Endi, usı baǵdarlardı esapqa alǵan halda oraylardıń ulıwma orta bilim beriw shólkemlerinde Oqıwshılardıń baslamaların qollap-quwatlaw boyınsha mektep másláhátshisi lawazımı engiziledi.

Olardıń tiykarǵı wazıypaları ulıwma orta bilim beriw shólkemlerinde “Prezidenttiń qábiletli perzentleri” milliy baǵdarlamasınıń mazmunın jarıtıw, onda názerde tutılǵan ideyalar menen maqsetlerdi oqıwshılar arasında keńnen úgit-násiyatlaw boyınsha sistemalı jumıslardı jolǵa qoyıw, ulıwma bilim beriw shólkemlerinde “Keleshek” orayları tarmaq dógerekleriniń jumısın sistemalı shólkemlestiriwden ibarat.

Sonday-aq, másláhátshiler oqıwshılardaǵı kommunikativlik hám shólkemlestiriwshilik qábiletin bekkemlew, olarda media hám sanlı sawatlılıqtı qáliplestiriwge járdemlesedi.

Mektep másláhátshisiniń lawazımlıq miynet haqısı ulıwma orta bilimlendiriw shólkemi direktorı orınbasarınıń lawazımlıq miynet haqısına teńlestiriledi, menedjerlik sertifikatına iye bolǵan mektep másláhátshilerine 2026-jıl 1-sentyabrden baslap sertifikattıń ámel etiw múddeti dawamında lawazımlıq miynet haqısına tiyislisinshe hár ayda 30 procent muǵdarında qosımsha ústemeler tólenedi. Onda 10 mıń 146 mektepte birewden másláhátshi jumıs alıp baradı.

Mekteplerdegi qábiletli oqıwshılardıń talantın júzege shıǵarıw, olardıń qábiletin rawajlandırıw, dógerek hám klublarǵa tartıw boyınsha “Mektep másláhátshisi” lawazımı engizilip atırǵanı da máselege úlken sheshim bolatuǵını tábiyǵıy. Úzliksiz bilimlendiriw sistemasındaǵı ruwxıy-aǵartıwshılıq baǵdardaǵı bul ózgerisler, oqıwshı-jaslardı milliy qádiriyatlarǵa sadıq, watansúyiwshilik ruwxında tárbiyalawda, álbette, óz nátiyjesin beredi.

Dildora DWSMATOVA.

ÓzA