Mámleketimizde insan huqıqları menen mápleri nızamlı túrde qorǵalıp kelinbekte. Konstituciyamızda hár bir shaxs miynet etiw, erkin kásip tańlaw, ádalatlı miynet sharayatlarında islew, miynetine jarasa miynet haqı alıw hám nızamda kórsetilgen tártipte jumıssızlıqtan qorǵanıw huqıqına iye ekenligi ayrıqsha atap ótilgen.

Biraq, miynet qatnasıqlarında jumıs beriwshi tárepinen xızmetker islegen dáwiri ushın miynet haqı nadurıs esaplanıwı yamasa ulıwma miynet haqı óz waqtında tólenbewi jaǵdayları jiyi ushırasıp turadı.
Atap aytqanda, Májbúriy orınlaw byurosı Nókis qalalıq bólimi tárepinen miynet haqısın óndiriw haqqındaǵı orınlaw hújjetleriniń orınlanıwın óz waqtında támiyinlew, ásirese, puqaralardıń buzılǵan huqıqların tiklew baǵdarında bir qatar jumıslar ámelge asırılmaqta.
Mısalı, puqaralıq isleri boyınsha Nókis hám Shımbay rayonlararalıq sudlarınıń orınlaw hújjetlerine tiykarlanıp, Respublika qánigelestirilgen ana hám bala salamatlıǵı ilimiy-ámeliy medicina orayınıń Qaraqalpaqstan Respublikası filialınan 3 puqaranıń paydasına jámi 161 million 116 mıń sumlıq miynet haqısın óndiriw haqqındaǵı orınlaw hújjetleri boyınsha Byuronıń Nókis qalalıq bólimi tárepinen orınlaw háreketleri alıp barıldı.
Májbúriy orınlaw byurosı málimleme xızmetiniń maǵlıwmat beriwinshe, usı orınlaw hújjeti dárhal orınlanıwı zárúrligi sebepli alıp barılǵan májbúriy orınlaw háreketleri dawamında miynet haqıları tolıq óndiriliwi támiyinlenip, 3 puqaranıń huqıqları tikleniwine erisildi.

Qaraqalpaqstan xabar agentligi