Qaraqalpaqstan awıl xojalıǵı hám agrotexnologiyalar institutında paxta teriw mashinaların basqarıw boyınsha oqıw-seminarları shólkemlestirildi.

Qaraqalpaqstan Respublikası Ministrler Keńesiniń basshılıǵında, «Uzagrolizing» AJ Qaraqalpaqstan bólimi, Qaraqalpaqstan awıl xojalıǵı hám agrotexnologiyalar institutı shólkemlestiriwinde ótkerilgen ilajda Túrkiya mámleketinen «Cansa», AQSh tan «John Deere», Qıtay mámleketinen «Boshiran», «FM World» kompaniyalarınıń juwapkerleri hám jergilikli qánigeler mexanizatorlardıń zamanagóy paxta teriw mashinaların basqarıw kónlikpesin qáliplestirip, jańa texnologiyalardı engiziwdiń áhmiyeti, qáwipsizlik qaǵıydalarına ámel etiw hám miynet ónimdarlıǵın arttırıw boyınsha zárúr usınıslar berildi.
Paxta jıyın-terimi procesin jedel hám nátiyjeli shólkemlestiriw, qol miynetin azaytıw maqsetinde Ózbekstan Respublikası Prezidentiniń 2025-jıl 19-fevraldaǵı tiyisli qararına muwapıq, Qaraqalpaqstan Respublikasına bıyılǵı jılı 60 dana zamanagóy paxta teriw mashinaları jetkerip beriliwi rejelestirilgen. Sonnan, házirgi kúnde Respublikamızǵa 43 dana paxta teriw mashinaları Qıtay, AQSh hám Túrkiya mámleketlerinen alıp kelindi.
Usı múnásibet penen 5-10-sentyabr kúnleri aralıǵında seminarlar shólkemlestirilip, oǵan fermer xojalıqlarınıń basshıları, kombayn operatorları hám mexanizatorlar qamtıp alındı.
Atap aytqanda, usı jıldıń 5-8-sentyabr kúnleri Boshiran, FM World, Cansa, John Deere hám basqa da sırt el kompaniyalarınıń juwapkerlerinen ibarat qánigeler atız sharayatında paxta teriw mashinaların basqarıw boyınsha ámeliy oqıw-seminarların shólkemlestirdi.
Seminarda Qaraqalpaqstan awıl xojalıǵı hám agrotexnologiyalar institutı «Awıl xojalıǵın mexanizaciyalastırıw» kafedrasınan docent E.Q.Sultanov, docent B.U.Nurabaev, t.i.f.d. (PhD) S.E.Tursımuratov hám t.i.f.d. (PhD) A.S.Baltaniyazovlar hám islep shıǵarıwshı kárxana qánigeleri ózleriniń teoriyalıq jáne ámeliy kónlikpeleri haqqında qatnasıwshı operatorlarǵa keńnen túsinik berip ótti.
Bul ilajlar awıl xojalıǵında mexanizaciya processlerin jedellestiriwge, zúráátlilikti hám miynet ónimdarlıǵın arttırıwǵa xızmet eteri sózsiz.

Qaraqalpaqstan xabar agentligi.