Prezidentimizdiń isbilermenlerdiń jumısların qollap-quwatlawı tiykarında engizilip atırǵan reformalar nátiyjesinde búgin óz biznesin jolǵa qoyıp shańaraǵı, máhállesi, el-jurttıń abadanlıǵına múnásip úles qosıp atırǵan isbilermenlerdiń qatarı barǵan sayın keńeymekte.

Ásirese, Prezidentimizdiń 2023-jıl 8-avgustta «Qaraqalpaqstan Respublikasında isbilermenler ushın qolaylı sharayatlar jaratıwǵa baylanıslı qosımsha ilajlar haqqında» ǵı pármanınıń qabıl etiliwi respublikamızda isbilermenler ushın úlken imkaniyatlardıń tiykarı boldı. Usı párman tiykarında orınlarda jumıs alıp barıp atırǵan isbilermenler óz jumısın jolǵa qoyıwı menen birge mol dáramat tawıp, xalıqqa xızmet etpekte
Usınday imkaniyatlardan orınlı paydalanıp atırǵan isbilermenler qatarında xojelishi G.Matmuratov 2021-jılı “Farms Gafur Gulam” JShJ sút ónimlerin islep shıǵarıwshı kárxananı iske túsirdi. Jumıs baslaǵan waqıtta 20 dan aslam jumısshı menen óz kárxananıń jumısın baslaǵan isbilermen, xalıqqa “Rich milk” hám “Elegato” atlı 15 túrdegi sút ónimlerin sapalı etip tayarlap, arzan bahalarda jetkerip beriwi nátiyjesinde házirgi waqıtta 60 tan aslam puqaranı jumıs penen támiyinlewge eristi. Demek, isbilermenlerge berilgen jeńillikler olardıń baslamaların qollap-quwatlaw, rawajlandırıw, jańa jumıs orınların jaratıw hám xalqımızdıń bántligin támiyinlew sıyaqlı baslı maqsetlerdi ámelge asırıwı menen áhmiyetli bolmaqta.
-Kárxanamızdıń bir kúnlik jumıs kólemi tórt tonnadan aslam bolıp, tiykarınan on besten aslam sút, qatıq, qaymaq, tvorog, yogurt, súzbe hám basqa da ónimlerdi islep shıǵarıp, respublikamızdıń barlıq orınlarına shártnama tiykarında jetkerip berip atırmız. Qarıydarlardıń ónimlerimizge bolǵan talabı jaqsı. Aldaǵı waqıtlarda ónimlerimizdiń kólemin jáne de arttırıp, wálayatlarǵa da jetkerip beriw niyetindemiz. Prezidentimizdiń isbilermenlerdi qollap-quwatlawı nátiyjesinde jumıslarımızdıń rawajlanıp atırǵanlıǵınan quwanıshlımız hám jurtbasshımızdan minnetdarmız,-deydi “Farms Gafur Gulam” JShJ baslıǵınıń orınbasarı Orınbasar Aygaliev.
Kárxanada jedellik penen alıp barılıp atırǵan jumıslar hám ónimlerdiń qarıydarlardıń kewlinen shıǵıwı isbilermenlerge berilgen jeńillikler, olardıń baslamaların qollap-quwatlaw, rawajlandırıw, jańa jumıs orınların jaratıw hám xalqımızdıń bántligin támiyinlew sıyaqlı baslı maqsetlerdi ámelge asırıwda áhmiyetli bolmaqta.

G.Turdıshova, Qaraqalpaqstan xabar agentligi