Ájiniyaz atındaǵı Nókis mámleketlik pedagogikalıq institutında student-jaslardıń dúnyaǵa degen kózqarasın keńeytiw, olardı buzǵınshı ideyalardan qorǵaw, huqıqıy sanası hám ruwxıy baylıǵın arttırıw maqsetinde Ózbekstan Respublikası Din isleri boyınsha komiteti menen birgelikte «Jawızlıqqa qarsı – aǵartıwshılıq penen gúres!» hám «Insan qádiri hám huqıqlarınıń ústinligi – rawajlanıw tiykarı» atamalarında ushırasıw shólkemlestirildi.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.
Ushırasıwǵa Din isleri boyınsha komitetiniń Qaraqalpaqstan Respublikası aymaqlıq basqarmasınıń bas qánigesi Nurulla Jamalov, Respublikalıq úgit-násiyatshılar toparınıń aǵzası, docent Qabıl Mámbetov, institutqa bıyılǵı oqıw jılında 1-kursqa oqıwǵa usınıs etilgen studentler, jaslar tárbiyasına juwapker qánigeler qatnastı.
Ilaj dawamında taraw qánigeleri házirgi waqıtta jaslardıń sanasına hár qıylı zıyanlı aǵımlar hám jalǵan ideyalar tásir ótkeriwge háreket etip atırǵanı, bunday qáwiplerge qarsı tek ǵana ilim, aǵartıwshılıq hám salamat kózqaras penen gúresiw múmkinligin atap ótti. Sonday-aq, studentlerge insan huqıqları hám qádiriyatlarınıń ústinligi jámiyettiń rawajlanıwı jáne turaqlılıǵı ushın áhmiyetli tiykar ekenligi haqqında tolıq túsinikler berildi.
Ushırasıw sońında studentler atap ótilgen máseleler boyınsha ózlerin qızıqtırǵan sorawlarǵa juwap aldı.
Ótkerilgen bul ilaj jaslardıń sanasın salamat ideyalar menen bayıtıw, olardı ana-Watanǵa sadıqlıq, milliy qádiriyatlarǵa húrmet hám joqarı huqıqıy mádeniyat ruwxında tárbiyalawda ayrıqsha áhmiyetke iye boldı.

Qaraqalpaqstan xabar agentligi