Mámleketimiz basshısınıń “Mámleketlik xızmetlerdi kórsetiw sistemasın jetilistiriw hám tarawda byurokratiyalıq tártip-qaǵıydalardı pútkilley qısqartıwǵa baylanıslı qosımsha ilajlar haqqında”ǵı pármanı qabıl etildi.

Pármanǵa bola, 2028-jılǵa shekem BIMXP (my.gov.uz) hám mámleketlik xızmetler orayları arqalı kórsetiletuǵın xızmetler sanı 900 ge jetkeriledi. Proaktiv mámleketlik xızmetler sanı 53 ke hám kompozit mámleketlik xızmetler 74 ke jetkeriledi.
Pármanǵa bola, 2025-jıl 1-dekabrden baslap uyımlararalıq málimleme almasıwın jolǵa qoyıw arqalı nekeni rásmiylestiriwde PHAJ uyımları tárepinen nekeleniwshi shaxslardan medicinalıq tekseriw nátiyjelerin usınıw talabı, nekeden sud qararı tiykarında ajıratılǵanda nekeden ajırasqanlıq haqqındaǵı akt jazıwın qáliplestiriw ushın PHAJ uyımları tárepinen sud qararınıń talap etiliwi, avtomototransport quralınıń dizimnen ótkeriw gúwalıǵında avtomototransport quralı iyesiniń mánzilin kórsetiw talabı biykar etiledi. BIMXPdaǵı shaxsqa tiyisli maǵlıwmatlar olardıń qaǵaz túrine teńlestiriledi.
2025-jıl 1-noyabrden Birden-bir interaktiv mámleketlik xızmetler portalında (Birden-bir portal) fizikalıq táreplerdiń belgilengen shaxsqa tiyisli maǵlıwmatları olardıń jeke kabineti arqalı real waqıt rejiminde usınıladı. Onda, fizikalıq shaxstıń Birden-bir portaldaǵı shaxsqa baylanıslı maǵlıwmatları olardıń qaǵaz túrine teńlestiriledi. Bul maǵlıwmatlar Birden-bir portaldıń mobil qosımshasınan paydalanǵan halda kórsetilgende mámleketlik uyımlar hám shólkemler tárepinen usı maǵlıwmatlardıń qaǵaz formasın talap etiw qadaǵan etiledi.
2025-jıl 1-noyabrden mámleketlik xızmetler oraylarına kelip múrájat etkende, pensioner, hámiledar hayallar hám 3 jasqa tolmaǵan balası menen kelgen puqaraǵa mámleketlik xızmetlerden gezeksiz paydalanıw boyınsha jeńillik beriledi. Fizikalıq táreplerdi birden-bir identifikaciya sistemasınan (OneID) dizimnen ótkeriwde alternativ tárizde shaxstı biometrikalıq identifikaciyalaw (Face ID) tártibi jolǵa qoyıladı. Mámleketlik xızmetler oraylarına Birden-bir portal arqalı engizilgen barlıq mámleketlik xızmetler boyınsha xalıq hám isbilermenlerge xızmet kórsetiw huqıqı beriledi.
2026-jıl 1-yanvardan “Vakolat.uz” platforması iske qosıladı. Onda mámleketlik xızmetlerden paydalanıw hám mámleketlik xızmet nátiyjelerin alıw boyınsha basqa shaxslarǵa isenim xatlardı rásmiylestiriw, yuridikalıq shaxslar tárepinen rásmiylestirilgen isenim xatlardı ıqtıyarlı dizimnen ótkeriw, barlıq túrdegi isenim xatlardıń haqıyqıylıǵın onlayn rejimde tekseriw imkaniyatı jaratıladı. “Vakolat.uz” platformasınan biypul tiykarda paydalanıw jolǵa qoyıladı.
2026-jıl 1-yanvardan Mámleketlik xızmetlerdiń birden-bir reestri Ádillik ministrligi tárepinen islep shıǵılatuǵın “Mámleketlik xızmetler” avtomatlastırılǵan onlayn málimleme sistemasında júrgiziledi.
Onda, hár bir mámleketlik xızmet boyınsha onıń sanlı pasportı qáliplestiriledi hám hár bir mámleketlik xızmetti Mámleketlik xızmetlerdiń birden-bir reestrine kirgiziw normativlik-huqıqıy hújjet tiykarında ámelge asırıladı.

N.Abduraimova,
ÓzA