Tómengi palata májilisinde yarım jıllıq byudjettiń orınlanıwı boyınsha esabat dodalawlarında “Baslamalı byudjet” processlerine de toqtap ótildi.

Málim etilgenindey, “Baslamalı byudjet” joybarınıń birinshi máwsimi sheńberinde 23 mıń joybar usınıs etilgen. Oǵan 10 mln.ǵa shamalas puqara qatnastı.
Máwsim juwmaǵına bola, ulıwma bahası 3,3 trillion sumlıq 2 mıń 419 joybar jeńimpaz dep tabıldı. Bul 2011 máhállege tuwra keldi. 813 máhálle eki máwsimde izbe-iz jeńimpaz bolǵanı sebepli keyingi máwsimde olarǵa tánepis járiyalanıp, usı ekinshi máwsimde qatnasıw imkaniyatı sheklendi. Nátiyjede 2-máwsim dawamında aldın bir márte de jeńimpaz bolmaǵan 408ge shamalas máhálle birinshi márte jeńimpaz boldı.
Nátiyjede aymaqlardaǵı ishki jollardı, mektep hám medicina shólkemlerin ońlaw hám úskenelew, máhállelerdi abadanlastırıw sıyaqlı joybarlarǵa qarjılar qaratılǵanı atap ótildi.
Sonday-aq, ministr Prezidenttiń tiyisli qararı menen xalıq wákilleriniń baslamalı byudjet procesindegi qatnası keńeytilgeni, olardıń usınısı menen jeńimpaz bolmaǵan joybarlar qarjılandırıp beriletuǵınına toqtap ótti. Bul deputatlardıń orınlardaǵı mashqalalardı sheshiwdegi qatnasın keńeytiwge xızmet etetuǵının atap ótti.
Sonıń menen birge, esabatta mámleketlik maqsetli qorlar byudjetleriniń orınlanıwı boyınsha da maǵlıwmatlar berildi.
Dodalawlarda deputatlar erisilgen unamlı nátiyjeler menen bir qatarda ayırım qáte-kemshiliklerge jol qoyılǵanına itibar qaratıp, bir qatar sorawlardı ortaǵa tasladı.
Atap aytqanda, deputat Athamjon Nazirqulov qala qurılısı normaları hám qaǵıydaların támiyinlew maqsetlerine ajıratılǵan byudjet qarjılarınıń tek ǵana 22 procenti jumsalǵanın atap ótip, qarjılardıń óz waqtında jumsalmaǵanınıń sebebi menen qızıqtı. Sonday-aq, bul gúzgi-qısqı máwsimge tayarlıq kóriw jumıslarına tásir etpey me, degen sorawdı berdi.
Oǵan juwap retinde Qurılıs hám turaq jay kommunallıq xojalıǵı ministriniń orınbasarı ıssılıq támiynatı tarawında ámelge asırılıp atırǵan jumıslar haqqında maǵlıwmat berdi. Atap ótilgenindey, esap beriw dáwirinde gúzgi-qısqı máwsimge tayarlıq kóriw ushın byudjetten 28 mlrd. sum ajıratılǵan. Onıń esabınan 53 qazan hám ıssılıq támiynatı sistemalarınıń ońlanıwı názerde tutılǵan. Búgingi kúnde 31 qazan tolıq ońlanǵanın, 1-oktyabrde gúzgi-qısqı máwsimge tayarlıq kóriw jumısları tolıq juwmaqlanatuǵının málim etti.

Muhtarama Komilova, ÓzA