Oraylıq Aziya xalıqaralıq institutı (OAXI) hám Hindstan xalıqaralıq qatnasıqlar keńesi (Indian Council of World Affairs – ICWA) arasında Birge islesiw haqqındaǵı memorandumǵa qol qoyıw boyınsha onlayn ilaj bolıp ótti, dep xabar beredi “Dunyo” MA.

Memorandumǵa OAXI direktorı Javlon Vahobov hám ICWA bas direktorı wazıypasın atqarıwshı Nutan Kapur Maxavar tárepinen qol qoyıldı. Ilajǵa Ózbekstannıń Delidegi hám Hindstannıń Tashkenttegi elshixanalarınıń wákilleri qatnastı.
Bul hújjet tárepler arasında ilimiy birge islesiwdi bekkemlew, birgeliktegi izertlewler, analitikalıq jumıs, ilimiy-ámeliy seminarlar hám dógerek sáwbetlerin ótkeriwdi názerde tutadı. Bul baslama Ózbekstan hám Hindstan arasındaǵı eki tárepleme qatnasıqlar, atap aytqanda, xalıqaralıq máseleler boyınsha ilimiy-analitikalıq baylanıslardı tereńlestiriwge xızmet etedi.
Tárepler memorandum Ózbekstan hám Hindstan arasındaǵı ekspertler dárejesindegi sóylesiwdi keńeytiw hám institucionallıq baylanıslardı bekkemlewde áhmiyetli qádem ekenin atap ótti.
Hindstanlı ekspertler Ózbekstan Prezidenti Shavkat Mirziyoev tárepinen ámelge asırılıp atırǵan pragmatikalıq, izbe-iz hám óz-ara isenimge tiykarlanǵan regionallıq siyasat Oraylıq Aziyanı tınıshlıq, turaqlılıq hám jaqsı qońsıshılıq mákanı sıpatında qáliplestiriwge xızmet etip atırǵan áhmiyetli faktor bolıp atırǵanın atap ótti.
Hindstan xalıqaralıq qatnasıqlar keńesi Ózbekstannıń tórtinshi analitikalıq mákemesi menen birge islesiwdi jolǵa qoydı. ICWA Ózbekstan Respublikası Prezidenti janındaǵı Strategiyalıq hám regionallıq izertlewler institutı, Sırtqı isler ministrligi janındaǵı Sırtqı siyasiy izertlewler hám xalıqaralıq baslamalar orayı jáne ShBSh Xalıq diplomatiyası orayı menen ilimiy-akademiyalıq baylanıslardı rawajlandırıp kelmekte.
ICWA Hindstan Sırtqı isler ministrligi janında jumıs alıp baratuǵın xalıqaralıq qatnasıqlar, geosiyasat hám diplomatiya baǵdarlarında izertlewler alıp barıwǵa qánigelesken jetekshi tallaw oraylarınan biri bolıp esaplanadı.

Qaraqalpaqstan xabar agentligi