Berdaq atındaǵı Qaraqalpaq mámleketlik universitetinde zamanagóy jámiyetti turaqlı hám ádil rawajlandırıwǵa qaratılǵan eki áhmiyetli tema – «Jawızlıqqa qarsı – aǵartıwshılıq penen gúres!» hám «Insan qádiri hám huqıqlarınıń ústinligi – rawajlanıw tiykarı» boyınsha ilajlar ótkerildi.

Ushırasıwǵa Din isleri boyınsha komitettiń Qaraqalpaqstan Respublikası aymaqlıq basqarması bas qánigesi N. Jamalov, universitettiń Insan huqıqları, mámleketlik huqıq hám basqarıw kafedrası docenti X.Kabulov, Siyasattanıw hám ruwxıylıq tiykarları kafedrası oqıtıwshısı G.Alimbetova hám studentler qatnastı.
Ilajdı universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov basqarıp bardı.
Onda sózge shıqqanlar atap ótkenindey, jawızlıq – bul ilimsizlik bolıp, ilimsiz hesh qashan rawajlanıwǵa erisip bolmaydı. Ózbekstan Respublikası Prezidenti Shavkat Mirziyoev tárepinen islep shıǵılǵan «Rawajlanıw strategiyası»nda belgilep berilgen jeti baslı wazıypanıń besinshisinde usı máselege ayrıqsha toqtalıp, «Muqaddes islam dinimizdiń gumanistlik ideyaların úgit-násiyatlaw, «Jawızlıqqa qarsı – aǵartıwshılıq» principi tiykarında ósip kiyatırǵan jaslarımızdı salamat isenim ruwxında tárbiyalawǵa ayrıqsha áhmiyet qaratamız. Hámmemizge belgili, Ózbekstan – úlken imkaniyatlar hám baylıqlarǵa iye mámleket. Biraq, bizlerdiń eń úlken baylıǵımız – hár qıylı millet hám xalıqlar, diniy konfessiyalar wákilleri arasındaǵı tınıshlıq hám turaqlılıq, óz-ara húrmet jáne awızbirshilik bolıp esaplanadı», – dep aytıp ótken edi.
-Bul ushırasıwdıń tiykarǵı maqseti – jámiyettiń rawajlanıwında ilim-aǵartıwshılıq hám insan huqıqlarınıń ornı, nadanlıq (bilim hám aǵartıwshılıq jetispewshiligi, kemsitiwshi stereotipler, jalǵan maǵlıwmatlar hám radikal kózqaraslar) penen gúresiwdiń nátiyjeli jolların anıqlaw, sonday-aq, insan qádiri hám huqıqların húrmet etiw principlerin joqarı bilimlendiriw orınlarında hám keń jámiyetshilikte tereńlestiriw bolıp esaplanadı. Bul baslama mámleketimizde turaqlı rawajlanıw, sociallıq hám milliy qádiriyatlardı saqlaw ushın áhmiyetli esaplanadı,-deydi Din isleri boyınsha komitettiń Qaraqalpaqstan Respublikası aymaqlıq basqarması bas qánigesi N.Jamalov.
Haqıyqatında da, ótken qısqa dáwir ishinde jámiyetimizdiń baslı ólshemi ruwxıylıq hám muqaddes dinimizdiń gumanistlik ideyaların úgit-násiyatlaw, «Jawızlıqqa qarsı – aǵartıwshılıq» principi tiykarında úlken ózgerisler ámelge asırıldı.
Tilekke qarsı, mámleketimizde ámelge asırılıp atırǵan usınday reformalar hám tariyxıy jańalanıwlarǵa, jaslar ushın jaratılıp atırǵan imkaniyatlarǵa qaramastan terrorizm, ekstremizm hám sol sıyaqlı illetlerge bilip-bilmey aralasıp qalıp atırǵan jaslar da aramızda ushırasıp turıptı.
Házirgi waqıtta kóz aldımızda dúnyanıń túrli jerlerinde júz berip atırǵan ekonomikalıq hám sociallıq, málimleme-kommunikaciyalıq tarawlardaǵı ózgerisler, hár qıylı ideologiyalar soqlıǵısıw keskin túrge enip atırǵan bir jaǵdayda, pikirge qarsı qarsı pikir, ideyaǵa qarsı ideya, jawızlıqqa qarsı aǵartıwshılıq penen gúresiw hár qashanǵıdan da úlken áhmiyetke iye bolmaqta.
Ótkerilgen ilajda jaslar arasında usınday baǵdardaǵı úgit-násiyat hám túsindiriw jumıslarınıń nátiyjeliligin arttırıw boyınsha pikirler bildirildi.
Sonday-aq, ilajda belsendi jaslar da sózge shıǵıp, jawızlıqqa qarsı – aǵartıwshılıq ideyaların jaslar arasında keń en jaydırıw maqsetinde ózleriniń pikir-usınısların bildirip ótti.

Qaraqalpaqstan xabar agentligi