Awǵanstan Bas ministriniń orınbasarı Abdul Salom Xanafiy shembi kúni Qabulda bolıp ótken “Investiciya tartıw hám Awǵanstan energetika sektorın qollap-quwatlaw” temasındaǵı xalıqaralıq konferenciyada dúnya jámiyetshiligin awǵan aktivlerin qaytarıw hám Islam ámirligin tán alıwǵa shaqırdı. Bul haqqında jergilikli rásmiy málimleme agentligi xabar tarqattı.

– Búgingi kúnde Awǵanstan Oraylıq hám Qubla Aziya arasında buwın bolıwǵa umtılmaqta, – dep onıń sózlerinen silteme keltirgen basılım. – Dúnya jámiyetshiligi muzlatılǵan awǵan aktivlerin qaytarıwı hám Islam Ámirligin tán alıwı kerek.
Dúnya jumıs orınların jaratıw hám jaslardıń bántligin támiyinlewge qaratılǵan ekonomikalıq joybarlardı ámelge asırıwda mámleketimizdi qollap-quwatlawı kerek. Awǵanstan teń salmaqlı siyasat alıp baradı, regiondaǵı hám basqa da barlıq mámleketler menen óz-ara húrmetke tiykarlanǵan jaqsı qatnasıq ornatıwǵa umtıladı. Aymaǵımızdan hesh bir mámleket hesh kimge qarsı paydalanıwına ruqsat berilmeydi. Bul ámeldegi húkimettiń qatań siyasatı. Elimizge investiciya kirgiziw ushın qolaylı sharayat jaratılǵan, bar maǵlıwmatlarǵa bola, mámlekette suw járdeminde 24 000 megavattan aslam energiya islep shıǵarıw potencialı bar. Házir elektr energiyası támiynatınıń 80 procenti ishki dárekler esabına tuwra keledi. Sonday-aq, ayırım bólegi Iran, Tájikstan hám Ózbekstannan import etiledi.

S.Rahimov, ÓzA