Paytaxtımızdaǵı “Túrkstan” kórkem óner sarayında Ózbekstan xalıq artisti Bahodir Ywldoshev tuwılǵanınıń 80 jıllıǵına baǵıshlanǵan saltanatlı ádebiy-aǵartıwshılıq keshe bolıp ótti.

Ilajǵa túrli ministrlikler hám uyımlar, dóretiwshilik shólkemlerdiń wákilleri, dóretiwshi zıyalılar, kórkem ónerge mehri bálent watanlaslarımız qatnastı.
Saray foesinde ustaz kórkem óner sheberiniń ómiri, jumısı hám kóp táreplemeli dóretiwshiliginen sóz etetuǵın kórgizbe shólkemlestirildi.
Saltanatlı ilajda Ózbekstan Respublikası Prezidentiniń keńesgóyi Xayriddin Sultanov Bahodir Ywldoshevtiń jumısı, dóretiwshiligi, adamgershilik pazıyletlerine hár tárepleme toqtap ótti.
Atap ótilgenindey, Bahodir Ywldoshev adamgershilik pazıyletleri oǵada joqarı bolǵan, kemshilik hám jaman illetlerdi jaktırmaytuǵın, el-xalqın súyetuǵın, milliy kórkem ónerimizdi rawajlandırıwdı ómiriniń mazmunına aylandırǵan dóretiwshi edi.
Ol zaman hám mákan nızamlıqların, insan psixologiyasın tereń túsingen kórkem óner ǵayratkeri edi. Bahodir Ywldoshevtiń tikkeley rejissyorlıǵındaǵı spektakller milliy teatr kórkem ónerimizdiń biybaha ǵáziynesine aylanǵan. Watanımızdıń Ǵárezsizlik, Nawrız bayramları, Xalıqaralıq maqam hám baqsıshılıq kórkem óneri festivallarınıń muzıkalıq baǵdarlamasın tayarlawda ayrıqsha pidayılıq hám jankúyerlik kórsetken dóretiwshi edi.
Mámleketimiz basshısı Bahodir Ywldoshevtiń dóretiwshiligine, onıń shaxsına bárqulla úlken húrmet, ayrıqsha mehir hám ǵamqorlıq, húrmet penen itibar qaratadı. Bul Prezidentimizdiń usı jıldıń avgust ayında qabıl etken pármanı tiykarında “Diydar” teatr-studiyasııń kórkemlik jaqtan basshısı Bahodir Ywldoshevti “Dwstlik” ordeni menen sıylıqlaǵanda da óziniń ayqın kórinisin taptı.
Saltanatlı ilajda Ózbekstan xalıq artistleri Yodgor Sadiev, Afzal Rafiqov, Elyor Nosirov, Ózbekstan Respublikasında xızmet kórsetken artistler Farhod Abdullaev, Munojat Teshaboeva, Ózbekstan xalıq artisti Abduhoshim Ismoilov Bahodir Ywldoshevtiń insanıylıq pazıyletleri, jumısqa, dóretiwshilikke sadıqlıq penen qatnas jasawı haqqında hár tárepleme sóz etti.
Ustaz kórkem óner ǵayratkeri haqqında gúrriń etiwshi hújjetli film oǵada tásirsheń hám qızǵın ruwxı menen ilaj qatnasıwshılarında úlken tásir qaldırdı.
– Sol dáwirde “Kelinler qozǵalańı” spektakliniń saxnalastırılıwı haqıyqıy dóretiwshilik qozǵalań edi, – dedi Ózbek Milliy akademiyalıq drama teatrınıń direktorı, Ózbekstan xalıq artisti Yodgor Sadiev. – Bunı Bahadir Ywldoshevtiń sol dáwirdiń kemshiliklerine, illetlerine qarsı kóterilisi edi, dep aytıw múmkin.
Saltanatlı ilajda spektakllerden úlgiler, kórkem filmlerden kórinisler kórsetildi. Dilbar nama-qosıqlar, tartımlı ayaq oyınlar keshege jáne de payız baǵıshladı.

Nazokat USMONOVA,
ÓzAnıń xabarshısı