Oliy Majlis Nızamshılıq palatasındaǵı Ózbekstan XDP frakciyasınıń gezektegi májilisinde Mámleketlik byudjet hám mámleketlik maqsetli qorları byudjetleriniń 2025-jıldıń birinshi yarım jıllıǵındaǵı orınlanıwı jáne bir qatar nızam joybarları dodalandı. Bul másele boyınsha ekonomika hám qarjı ministriniń orınbasarı Otabek Fozilkarimov málimleme berdi.

Deputatlar sociallıq tarawǵa baǵdarlanǵan qarjılardıń kólemi artqanın, xalıqtı sociallıq qorǵaw, bilimlendiriw, densawlıqtı saqlaw hám infrastrukturanı jetilistiriwge ayrıqsha itibar qaratılǵanın atap ótti. Sonday-aq, Mámleketlik byudjettiń orınlanıwındaǵı joqarı nátiyjelerdi atap ótken halda ayırım mashqalalı máselelerdi hár tárepleme dodaladı. Atap aytqanda, investiciyalıq baǵdarlamalarǵa kirgen joybarlar, ásirese, bilimlendiriw, medicinalıq xızmetler menen baylanıslı joybarlardıń óz waqtında ámelge asırılmay atırǵanınıń sebepleri tallandı.
Sonday-aq, deputatlardıń aymaqlardaǵı úyreniwleri dawamında tuwıw kompleksleri, iri medicina mákemelerinde medicinalıq ásbap-úskenelerdi zıyansızlandırıw, sterilizaciyalaw jumısları talap dárejesinde emesligi baqlanıp atırǵanı aytıp ótildi. Frakciya wákilleri bul baǵdarda qanday ilajlar kórilip atırǵanı menen qızıqtı.
Buǵan juwap retinde Densawlıqtı saqlaw ministrliginiń juwapkeri aymaqlardaǵı medicina mákemeleriniń sterilizaciya bólimleriniń 28 procenti autsorsingke berilgenin málim etti. Sonıń menen birge, 78 rayon hám qalada sterilizaciya sisteması jańadan engizilip atırǵanın aytıp ótti.
Bunnan tısqarı, májiliste jámiyetlik transport tarawı elege shekem ózin-ózi qaplaw dárejesine shıqpay atırǵanı, sonıń ushın Mámleketlik byudjetten qollap-quwatlanıp atırǵanı sınǵa alındı. Húkimet wákilleriniń atap ótiwinshe, jámiyetlik transporttaǵı tariflerdiń qayta kórip shıǵılmaǵanı, temir jol infrastrukturasınıń házirgi jedel talaplarǵa jeterli dárejede juwap bermey atırǵanı, tarawda báseki ortalıǵınıń rawajlanıwı qıyınlasıp atırǵanı mashqalalarǵa sebep bolmaqta.
Dodalawlarda ÓzXDP elektoratı hám baǵdarlamalıq maqsetleri menen tıǵız baylanıslı bolǵan bántlik hám jumıs orınların jaratıw máselesine de itibar qaratıldı.
Bunnan soń májiliste mayıplıǵı bolǵan balalarǵa sociallıq xızmet hám járdem kórsetiwshi isbilermenlik subektleriniń jumısın qollap-quwatlawǵa qaratılǵan nızam joybarı kórip shıǵıldı. Oǵan bola, perzentlerge mámleketlik emes mektepke shekemgi bilimlendiriw shólkemleri yamasa mektepler tárepinen kórsetiletuǵın bilimlendiriwge baylanıslı xızmetler, sonday-aq, 3 jastan 18 jasqa shekem mayıplıǵı bolǵan balalar ushın kúndizgi tárbiya xızmetlerinen paydalanǵanda, hár bir perzent ushın tólenetuǵın ayına 3 million sumǵa shekemgi tólemler salıqtan azat etiliwi kútilmekte.

Muhtarama Komilova, ÓzA