Qaraqalpaqstan Respublikası Ministrler Keńesinde turaq jay qurılısı hám onı qarjılandırıwǵa baylanıslı máseleler boyınsha májilis bolıp ótti.

Onda rayonlardıń hákimleri, mámleketlik kadastrlar palatası, kommerciyalıq bankler hám qurılıs shólkemleriniń juwapkerleri qatnastı.
Májilisti Qaraqalpaqstan Respublikası Ministrler Keńesiniń Baslıǵı F.Ermanov basqarıp bardı.
Onda atap ótilgenindey, 2024-2025-jılları bank kreditleri esabınan qurılısı rejelestirilgen kóp qabatlı turaq jaylardıń ayırımlarında ámeliy jumıslar belgilengen múddetten artta qalmaqta. Sonday-aq, qurıp pitkerilgen hám satılǵan kvartiralar boyınsha Mámleketlik kadastrlar palatası usınǵan maǵlıwmatlar tallanıp, qurılıs kárxanalarınıń banklerge kredit alıw ushın tapsırǵan hújjetleri hám olardıń jaǵdayı da sın kózqarastan kórip shıǵıldı. Atap aytqanda, ayırım kárxanalarda finanslıq esabatlardıń keshigiwi, joybarlardıń anıq rejelestirilmegeni hám sapaǵa baylanıslı kemshilikler kórsetip ótildi.
Usılar menen bir qatarda májiliste qurılısı hám tapsırılıwı belgilengen turaq jaylar haqqında maǵlıwmatlar berilip, qosımsha turaq jaylar qurıw ushın aukcion sawdalarına shıǵarılıp atırǵan jer maydanları máselesi de dodalandı.
Májilis dawamında Ministrler Keńesiniń Baslıǵı juwapkerlerge turaq jay qurılısın belgilengen múddetlerde hám sapa talaplarına tolıq ámel etken halda ámelge asırıw, bank kreditleri tiykarında qarjılandırıw procesin ashıq-aydın shólkemlestiriw hám turaq jay bazarında artıqsha byurokratiyalıq tosqınlıqlarǵa jol qoymaw boyınsha qatań kórsetpeler berdi.

Qaraqalpaqstan xabar agentligi