Nókiste Qaraqalpaqstan Respublikası hám Xorezm wálayatında Mobiuz tarmaqların modernizaciyalawdıń birinshi basqıshı nátiyjelerine baǵıshlanǵan rásmiy ilaj ótkerildi.

Onda Qaraqalpaqstan Respublikası Joqarǵı Keńesi, Sanlı texnologiyalar ministrligi hám «Ózkomnazorat» inspekciyasınıń aymaqlıq basqarmaları wákilleri, Mobiuz hám ZTE Uzbekistan basshıları hám wákilleri qatnastı.
Ilajda Mobiuz mobil operatorı investiciya strategiyasın jedel ámelge asırıp atırǵanı atap ótildi. Sonday-aq, ilaj qatnasıwshılarına SWAP joybarınıń birinshi basqıshınıń nátiyjeleri haqqında tolıq maǵlıwmat berildi.
Sońǵı jılları barlıq aymaqlarda sanlı infrastrukturanı rawajlandırıw, xalıq hám biznes ushın sanlı xızmetlerdi engiziw boyınsha mámleketimiz tárepinen belgilengen baǵdar sheńberindegi wazıypalar tabıslı ámelge asırılmaqta. Atap aytqanda, Qaraqalpaqstan Respublikası hám Xorezm wálayatında Mobiuz tarmaqları hám úskenelerin modernizaciyalaw SWAP joybarınıń ámelge asırılıwı bunıń ayqın mısalı esaplanadı. Joybardı ámelge asırıw ushın telekommunikaciya texnologiyaları tarawındaǵı dúnya jetekshilerinen biri – ZTE Corporation kompaniyası tartıldı.
Qaraqalpaqstan Respublikası hám Xorezm wálayatındaǵı tarmaqlardı texnikalıq qayta úskenelew joybarınıń ulıwma bahası 30 million dollardan aslam bolıp, búgingi kúnge shekem 13 million dollardan artıq qarjı ózlestirildi. SWAP joybarı sheńberinde Qaraqalpaqstanda 314 radioreley aralıǵı hám 268 tayanısh stanciya almastırıldı. 637 jańa tayanısh stanciya iske qosıldı.
Ilaj sheńberinde mobil internet tezliginiń janlı ólshewleri ótkerildi. Keleshekte Qaraqalpaqstan hám Xorezm wálayatında SWAP joybarı dawam ettiriletuǵını hám keńeytiletuǵını atap ótildi.

Qaraqalpaqstan xabar agentligi