Qaraqalpaqstan Respublikası Ministrler Keńesiniń Baslıǵı F.Ermanov awıl xojalıǵında paxta teriw kombaynların basqarıwshı mexanizatorlar hám tarawǵa juwapker tiyisli qánigeler menen ushırasıw ótkerdi.

Ilajda aymaqta paxta jıyın-terimi máwsimine tayarlıq processleri, bar imkaniyatlardan nátiyjeli paydalanıw hám mexanizaciya dárejesin bunnan bılay da arttırıw máseleleri dodalandı.
Ushırasıwda mexanizatorlardı zamanagóy paxta teriw kombaynların basqarıwǵa oqıtıw hám qayta tayarlaw jumısları, olardıń bilim hám mamanlıǵın arttırıw boyınsha ámelge asırılıp atırǵan ilajlar haqqında keń túrde aytılıp, qánigeler tárepinen jańa texnologiyalardı engiziw, qáwipsizlik qaǵıydalarına ámel etiw hám miynet ónimdarlıǵın arttırıw boyınsha zárúr usınıslar berildi.
Qaraqalpaqstan Respublikası Ministrler Keńesiniń Baslıǵı jıyın-terim mapazın shólkemleskenlik penen ótkeriw, bar texnikalardı tolıq mobilizaciyalaw hám mexanizatorlarǵa múnásip sharayat jaratıw zárúrligine toqtap ótti.
Sonday-aq, maman kadrlardı tayarlaw hám olardan nátiyjeli paydalanıw, paxta zúráátin óz waqtında hám sapalı jıynap alıwda áhmiyetli faktor ekeni atap ótildi.

Qaraqalpaqstan xabar agentligi