Shımbay rayonındaǵı Doslıq mákan puqaralar jıyınında sud uyımı xızmetkerleriniń aymaq turǵınları menen ushırasıwı ótkerildi.

Ilajǵa Shımbay rayonlararalıq ekonomikalıq sudınıń baslıǵı B.Bekmuratov hám jınayat isleri boyınsha Shımbay rayonı sudınıń tergew sudyası R.Kaukishev qatnastı.
Ushırasıwda sudyalar tárepinen puqaralarǵa Prezidentimizdiń 2025-jıl 21-avgustta qabıl etilgen «Sudlardıń jumısına jasalma intellekt texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı ilajlar haqqında»ǵı pármanı jáne «Ádil sudlaw tarawında joqarı mamanlıqtaǵı kadrlar tayarlaw sistemasın túp-tiykarınan jetilistiriw ilajları haqqında»ǵı pármanınıń áhmiyeti keńnen túsindirip berildi. Atap ótilgenindey, Prezidentimizdiń usı jıl 21-avgusttaǵı PP-140-sanlı Pármanı sud sistemasında sanlastırıwdı jańa basqıshqa alıp shıqtı. Usı pármanǵa bola, endi sud islerin elektron túrde júrgiziw imkaniyatları keńeytiledi. Jasalma intellekt tiykarında isleytuǵın tallaw platformaları engizilip, «aqıllı sud zalları» hám onlayn múrájat sistemaları keń kólemde jumıs baslaydı. Sonday-aq, sud qararlarınıń ashıq-aydınlıǵın támiyinlew ushın ashıq maǵlıwmatlar bazası jaratıladı.
Puqaralar ushın sudlarǵa múrájat etiw, jumıslardı baqlaw hám qararlar menen tanısıw procesi biraz jeńillestiriledi.
Joqarıda atap ótilgendey Prezidentimizdiń bul pármanları sud sistemasında jańa basqıshtı baslap bermekte.
-Tarawǵa jasalma intellekt texnologiyalarınıń engiziliwi, sud imaratlarınıń materiallıq-texnikalıq támiynatınıń jaqsılanıwı, sudyalardıń mamanlıǵı arttırılıwı, puqaralardıń ádil sudlawǵa bolǵan isenimin bekkemleydi,-deydi jınayat isleri boyınsha Shımbay rayonı sudınıń tergew sudyası R.Kaukishev.
Ilaj dawamında qatnasıwshılar ózlerin qızıqtırǵan sorawlarǵa juwap aldı.

Adilbay Orazov,
Qaraqalpaqstan xabar agentligi sholıwshısı