Isbilermenler búgingi kúnde ekonomikamızdıń rawajlanıwına salmaqlı úles qosıw menen birge, jańa jumıs orınların jaratıwda áhmiyetli xızmet atqarıp kelmekte. Olardıń jumısların qollap-quwatlawda bolsa, tikkeley jaqınnan pikirlesiw arqalı mashqalalarına sheshim tabıw búgingi kúnniń talabı bolıp tabıladı.

Elimizdiń basqa aymaqlarında bolǵanı sıyaqlı, respublikamızda da isbilermenlerdi hár tárepleme qollap-quwatlawǵa ayrıqsha itibar qaratılıp, respublikamız basshıları tárepinen olar menen ashıqtan-ashıq sóylesiwler ótkerilmekte.
Usınday ushırasıwlardıń biri Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Nókis qalasında ótkerildi.
Onda jańa joybarlardı iske túsiriwde ushırasıp atırǵan mashqalalardı anıqlaw hám olardı saplastırıw, investiciyalıq joybarlardı iske túsiriw, sanaat ónimlerin islep shıǵarıwshı kárxanalardıń tolıq quwatlıqta islewin támiyinlew máseleleri talqılandı. Ushırasıwǵa Tórtkúl, Beruniy, Taxtakópir, Qaraózek, Bozataw hám Qanlıkól rayonlarındaǵı isbilermenler, usı rayon hákimleri hám juwapker ministrlik, mákeme basshıları qatnastı.
Ótkerilgen ushırasıwda ayırım taraw juwapkerleriniń óz jumısına nemquraydılıq penen qarawı hám basqa da sebeplerge baylanıslı ushırasıp atırǵan mashqalalar boyınsha pikirlesip, isbilermenlerdi qıynap kiyatırǵan mashqalalar tıńlandı hám bildirilgen múrájatlardıń basım kópshiligine ornında sheshimin tabıw ilajları kórildi. Waqıt talap etiletuǵın múrájatlar qadaǵalawǵa alınıp, tez pursatta unamlı sheshiw boyınsha tiyisli taraw basshılarına tapsırmalar berildi.

Qaraqalpaqstan xabar agentligi