Oliy Majlis Nızamshılıq palatasınıń Spikeri Nuriddin Ismoilov Vengriya Milliy assambleyası baslıǵınıń orınbasarı Ishtvan Yakab penen ushırastı.

Ushırasıwda Ózbekstan hám Vengriya arasındaǵı qatnasıqlardı, sonıń ishinde, parlamentleraralıq birge islesiwdi rawajlandırıw perspektivaları dodalandı.
Ózbek hám venger xalıqların uqsas tariyxıy tamırlar, tıǵız birge islesiw qarım-qatnasları baylanıstırıp turadı. Keyingi jılları eki mámleket basshılarınıń isenimli siyasiy erk-ıqrarı, joqarı dárejedegi ushırasıwları sebepli Ózbekstan – Vengriya arasındaǵı strategiyalıq sheriklik hám ámeliy birge islesiw izbe-iz rawajlanıp, barlıq dárejelerde jedel sóylesiwler dawam etpekte.
Prezident Shavkat Mirziyoevtiń usı jıldıń may ayında Vengriyaǵa saparı mámleketlerimiz arasındaǵı kóp táreplemeli birge islesiwdi keńeytip, eki tárepleme baylanıslardı jańa basqıshqa alıp shıqtı.
Sóylesiw dawamında Nızamshılıq palatasınıń Spikeri miyman tárepke jańa redakciyadaǵı Konstituciya hám “Ózbekstan – 2030” strategiyası sheńberinde mámleketimizde ámelge asırılıp atırǵan keń kólemli reformalar, Nızamshılıq palatasınıń strukturalıq dúzilisi, onıń nızam dóretiwshiligi hám parlamentlik qadaǵalaw baǵdarındaǵı jumısı haqqında maǵlıwmatlar berdi.
Óz gezeginde, I.Yakab jıllı hám doslıq múnásibet ushın minnetdarshılıq bildirip, Prezident Shavkat Mirziyoevtiń basshılıǵında sońǵı jıllarda mámlekette keń kólemli reformalar ámelge asırılıp atırǵanın ayrıqsha atap ótti. Atap aytqanda, Tashkent hám Samarqand qalaları xalıqaralıq diplomatiya oraylarına, iri xalıqaralıq ilajlar – forumlar, sammitler hám ánjumanlar ótkeriletuǵın orınǵa aylanıp baratırǵanın atap ótti.
– Ózbekstan – Vengriya arasındaǵı birge islesiw barǵan sayın rawajlanıp barmaqta. Biz mámleketińizde ámelge asırılıp atırǵan ózgerislerdi úlken qızıǵıwshılıq penen baqlap barmaqtamız. Barlıq tarawlarda, sonıń ishinde, parlamentarizmde bolıp atırǵan processler itibarımızdı tartpaqta. Vengriya Ózbekstan menen birge islesiwdiń keń spektrinde birgelikte rawajlanıwdıń tárepdarı hám oǵan bárqulla tayar,-dedi I.Yakab.
Sóylesiwde eki tárepleme qatnasıqlardı tereńlestiriw, parlament diplomatiyasınıń potencialınan nátiyjeli paydalanıw, nızam dóretiwshiligi boyınsha tájiriybe almasıw ushın tiyisli komitetler arasında baylanıslardı jolǵa qoyıw kerekligi ayrıqsha atap ótildi.

ÓzA