Watanımızdıń keleshegi bolǵan jas áwladtıń hár tárepleme jetik, máripatlı hám watansúygish bolıp kamalǵa keliwinde bilimlendiriwdiń ornı sheksiz. Balalardıń bilim alıwǵa bolǵan qızıǵıwshılıǵın qollap-quwatlaw, olardıń teńdey bilim alıw imkaniyatların támiyinlew búgingi reformalardıń tiykarǵı baǵdarlarınan biri. Ásirese, jańa oqıw jılı baslanǵanda bunday itibar hám ǵamqorlıq jaslardıń kewlinde úlken tásir qaldıradı.
Usı iygilikli maqset jolında 2-sentyabr – Bilimler kúni múnásibeti menen Ámiwdárya rayonında ámeliy baslama ámelge asırıldı. Rayon hákiminiń tikkeley baslaması menen 200 járdemge mútáj shańaraqlardıń perzentlerine mektep forması saltanatlı túrde tapsırıldı.
Ilajda rayon hákiminiń orınbasarları – G.Saburova hám N.Kamolov, sonday-aq, rayonlıq Mektepke shekemgi hám mektep bilimlendiriwi bóliminiń baslıǵı Ya.Shomuratov qatnastı. Olar balalarǵa jańa forma tarqatıp, jaqsı tilekler bildirip, jańa oqıw jılında áwmet hám tabıslar tiledi,-deydi rayon hákimligi Málimleme xızmeti bólimi.
Bunday ilajlar tek ǵana oqıwshılardıń júzinde quwanısh oyatıp qoymastan, al olardıń qálbinde bilim alıwǵa bolǵan qızıǵıwshılıǵın jáne de arttıradı. Mektep forması menen támiyinlengen balalar jańa oqıw jılın kóterińki keypiyatta baslaw imkaniyatına iye boldı.
Bilim hám aǵartıwshılıqtı tiykarǵı qádiriyat sıpatında belgilegen elimizde balalar ushın jaratılıp atırǵan imkaniyatlar – keleshekke qoyılıp atırǵan bekkem tırnaq bolıp esaplanadı. Ámiwdárya rayonında ótkerilgen bul ilaj da mine, usı iygilikli háreketlerdiń jáne bir ámeliy kórinisi boldı.

Qaraqalpaqstan xabar agentligi