Awıl xojalıǵı – mámleket ekonomikasında áhmiyetli orın tutatuǵın tarmaqlardan biri bolıp esaplanadı. Ásirese, paxtashılıq tarawı elimizde mıń jıllıq dástúrlerge iye bolıp, házirgi kúnde de ekonomikalıq turaqlılıq hám xalıqtıń bántligin támiyinlewde úlken áhmiyetke iye bolmaqta.

Bıyılǵı paxta jıyın-terimi máwsimin shólkemleskenlik penen shólkemlestiriw, zúráátti zaya etpey jıynap alıw maqsetinde arnawlı terim otryadları qáliplestirildi. Terim mapazında 16 mıń 115 ge shamalas terimshiniń qatnasıwı rejelestirilmekte. Olar ushın atızlarda barlıq sharayatlar jaratılǵan – miynet procesi nátiyjeli hám qáwipsiz ótiwi ushın zárúr sharayatlar shólkemlestirilgen.
Beruniy rayonındaǵı paxta tazalaw zavodına usı jıldıń dáslepki paxta kárwanı jetip keldi. Usı múnásibet penen shólkemlestirilgen ilajda Qaraqalpaqstan Respublikası Ministrler Keńesi Baslıǵınıń orınbasarı, awıl xojalıǵı ministri Sh.Teshaev, Beruniy rayonı hákimi I.Xidirov, awıl xojalıǵı qánigeleri, nuranıylar hám fermer xojalıqlarınıń basshıları qatnastı.
Jıyın-terim máwsimi aldınan jaqsı niyetler bildirilip, pátiyaǵa qol jayıldı. Fermer xojalıǵı jumısshıları hám mexanizatorlar múnásip xoshametlendi. Soń, paxta qabıllaw punktlerine tapsırıldı, – dep maǵlıwmat beredi rayon hákimligi Málimleme xızmeti bólimi.
2025-jılı Beruniy rayonında 8 500 gektar maydanǵa shigit egilgen. Búgingi kúnde atızlarda miynet etip atırǵan fermerler, mexanizatorlar hám kewilli terimshilerdiń háreketleri arqalı mine, usı miynettiń nátiyjesi kózge taslana basladı.
Zúráátti júzege shıǵarıw ańsat bolmaǵanınday, onı tolıq jıynap alıw da juwapkershilikti talap etedi. Sonlıqtan, barlıq terimshilerge úlken kúsh, densawlıq hám áwmet tileymiz.

Qaraqalpaqstan xabar agentligi