Respublikamızda xalıqqa kórsetilip atırǵan medicinalıq xızmetlerdiń sapasın arttırıw, ámeliy medicinanı ilimiy principler tiykarında jetilistiriw arqalı nátiyjeli medicinalıq járdem kórsetiw, sistemada ámelge asırılıp atırǵan reformalardı turaqlı dawam ettiriw maqsetinde, Ózbekstan Respublikası Prezidentiniń 2024-jıl 12-dekabrdegi «Qaraqalpaqstan ilimiy-ámeliy medicina Akademiyasın shólkemlestiriwge baylanıslı ilajlar haqqında»ǵı PQ-453-sanlı qararı menen respublikamızda ilimiy-ámeliy medicina akademiyasın shólkemlestiriw belgilengen edi.
Usı qarardıń orınlanıwın támiyinlew maqsetinde búgin usı Akademiya qurılısınıń ámeliy jumısları baslandı.
Ilajda Qaraqalpaqstan Respublikası Ministrler Keńesiniń Baslıǵı F.Ermanov qatnasıp, elimizde medicina tarawın rawajlandırıw, zamanagóy ilimiy-ámeliy oraylardı shólkemlestiriwdiń áhmiyetine ayrıqsha toqtap ótti. Atap ótilgenindey, bul akademiya tek ǵana joqarı tájiriybeli qánigelerdi tayarlaw emes, al xalıqqa sapalı medicinalıq xızmet kórsetiw imkaniyatların keńeytiwge xızmet etedi.
Jańa ilimiy-ámeliy medicina akademiyası respublikamızdıń medicina infrastrukturasın bunnan bılay da rawajlandırıw, jas qánigeler ushın keń imkaniyatlar jaratıw hám xalqımızdıń salamatlıǵın bekkemlew jolında áhmiyetli qádem bolıp xızmet etedi.

Qaraqalpaqstan xabar agentligi