Shashtárezxana hám gózzallıq salonları xızmetleri tarawı respublika ekonomikasınıń xızmet kórsetiw sektorında jetekshi tarmaqlardan birine aylanbaqta. Milliy statistika komiteti maǵlıwmatlarına bola, 2025-jıldıń yanvar-iyul aylarında Ózbekstanda shashtárezxana hám gózzallıq salonları tárepinen kórsetilgen xızmetler kólemi 7 trillion sumǵa jetti.

Házirgi waqıtta shashtárezxana hám gózzallıq salonlarınıń xızmetleri tek ǵana xalıqtıń talapların támiyinlew emes, al aymaqlardıń ekonomikalıq belsendiligin arttırıwda da áhmiyetli orın iyelemekte.
Aymaqlar kesiminde xızmetler kólemi Tashkent qalasında eń joqarı bolıp, 1228,9 milliard sumdı quramaqta. Sonıń menen birge, Ferǵana wálayatında – 952,8 milliard sum, Samarqand wálayatında – 878,6 milliard sum, Namangan wálayatında – 765,5 milliard sum, Tashkent wálayatında – 708,3 milliard sum, Ándijan wálayatında – 446,1 milliard sum, Qashqadárya wálayatında – 425,8 milliard sum, Xorezm wálayatında – 345,1 milliard sum, Qaraqalpaqstan Respublikası – 328 milliard sum, Surxandárya wálayatında – 243,1 milliard sum, Buxara wálayatında – 228,1 milliard sum, Nawayı wálayatında – 222,8 milliard sum, Jizzaq wálayatında – 148,2 milliard sum, Sırdárya wálayatında 95 milliard sumdı quraǵan.
Aymaqlarda xalıqtıń tıǵızlıǵı hám ekonomikalıq belsendiliktiń joqarılıǵı, sonday-aq, xızmet kórsetiw tarawındaǵı infrastrukturanıń rawajlanıwı bul kórsetkishlerge tásir etpekte.
Shashtárezxana hám gózzallıq salonları xızmetleri kóleminiń ósiwinde bir qatar faktorlar rol atqaradı. Bárinen burın, xalıqtıń jasaw dárejesiniń jaqsılanıwı, qala hám rayonlarda xızmet kórsetiw infrastrukturasınıń keńeyiwi hám sapasınıń artıwı bul baǵdarda áhmiyetli tásir kórsetti. Sonday-aq, jas áwlad arasında gózzallıqqa bolǵan talaptıń artqanı, moda hám jeke tárbiyaǵa qızıǵıwshılıqtıń rawajlanıwı xızmetler kólemin kóbeytti.

ÓzA