Ámiwdárya rayonı hákimliginde Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komitetiniń baslıǵı M.Ahmedovanıń qatnasıwında “Máhálle jetiligi” juwapkerleri menen ushırasıw bolıp ótti, – dep maǵlıwmat beredi rayon hákimliginiń Málimleme xızmeti bólimi.

Májiliste hayal-qızlardıń bántligin támiyinlew, olardı máwsimlik hám turaqlı jumıs orınlarına tartıw, shańaraqtıń bekkemligin támiyinlew, ajırasıwlardı azaytıw, sonday-aq, hayal-qızlar isbilermenligin rawajlandırıw máseleleri hár tárepleme dodalandı. Hayal-qızlardı kásip-ónerge oqıtıw, olardı sociallıq belsendilikke tartıw hám shańaraqlıq isbilermenlikti keńeytiw boyınsha juwapkerlerge anıq wazıypalar júklendi.
Ilaj dawamında máhállelerde ámelge asırılıp atırǵan jumıslar tallanıp, mashqala hám kemshiliklerge sheshim sıpatında hár bir aymaq boyınsha anıq usınıslar islep shıǵıldı. Bunday qatnas, bárinen burın, máhálleniń ózinde mashqalalardı saplastırıw, hayal-qızlarǵa mánzilli járdem kórsetiw imkaniyatın beredi.
Hayal-qızlardıń jámiyette múnásip orın iyelewi, óz potencialın tolıq kórsetiwi tek ǵana shańaraq emes, al máhálle hám pútkil mámlekettiń rawajlanıwı ushın úlken áhmiyetke iye. Sonlıqtan, bunday ámeliy ushırasıwlardıń sistemalı túrde ótkeriliwi iygilikli maqsetlerdi ámelge asırıwda áhmiyetli qádem bolıp xızmet etedi.

Qaraqalpaqstan xabar agentligi