Oliy Majlis Nızamshılıq palatasındaǵı “Milliy tiklanish” demokratiyalıq partiyası frakciyasınıń májilisi bolıp ótti. Onda dáslep Prezidentimizdiń Shanxay birge islesiw shólkemi Mámleket basshıları keńesi májilisindegi tariyxıy shıǵıp sóylegen sóziniń áhmiyeti haqqında sóz etildi.

Atap ótilgenindey, sammitte ShBSh sheńberindegi kóp tárepleme birge islesiwdi bunnan bılay da rawajlandırıw, shólkemniń jumısın jetilistiriw perspektivaları dodalanıp, regionallıq hám xalıqaralıq áhmiyetke iye aktual máseleler boyınsha óz-ara pikir alıstı.

Mámleketimiz basshısı Qıtay Xalıq Respublikasına saparı sheńberinde usı mámlekettiń jetekshi kompaniyalarınıń basshıları menen de ushırastı. Sońǵı jılları Qıtay biznesiniń Ózbekstanǵa qızıǵıwshılıǵı jıldan-jılǵa kúsheymekte. Ózbekstanǵa eń kóp investiciya kirgizip atırǵan mámleketlerden biri sıpatında Qıtaydıń investiciyalıq joybarlar portfeli 60 milliard dollardan artpaqta. Tek ǵana ótken jıldıń ózinde investiciyalardıń kólemi 10 milliard dollardan astı. Kompaniyalardıń basshıları menen ushırasıwlar jańa óndirislik quwatlıqlardı iske qosıwda ayrıqsha áhmiyetke iye ekeni atap ótildi.

Frakciyanıń gezektegi májilisinde Mámleketlik byudjet hám maqsetli qorlar byudjetleriniń 2025-jıldıń birinshi yarım jıllıǵındaǵı orınlanıwın kórip shıǵıw rejelestirilgen. Sonnan kelip shıǵıp, deputatlar byudjettiń orınlanıwın dáslepki tárizde kórip shıqtı. Mámleketlik byudjetti dodalawda partiya ideyalarınan kelip shıǵıp qanday máselelerge itibar qaratıw kerekligi boyınsha óz-ara pikir alıstı.

Atap ótilgenindey, aymaqlarda xalıqtıń bántligi hám isbilermenlikti rawajlandırıw boyınsha ilajlar hám ámelge asırılǵan reformalar nátiyjesinde usı jıldıń birinshi yarım jıllıǵında jalpı ishki ónimniń kólemi 7,2 procentke ósken.

Sonday-aq, frakciya aǵzaları tálim-tárbiya, mekteplerdi sabaqlıqlar hám oqıw qollanbaları menen tolıq támiyinlew baǵdarındaǵı máselelerge itibar qarattı. Esap beriw dáwirinde bul baǵdarda nátiyjeli jumıslar islengeni, sonıń ishinde, sabaqlıqlar menen baylanıslı qárejetlerge 784,8 milliard sum, muzıka ásbapların satıp alıwǵa bolsa 49,4 milliard sum jumsalǵanı atap ótildi.

ÓzA