Ózbekstan Ekologiyalıq partiyası frakciyasınıń gezektegi májilisi bolıp ótti. Onda bir qatar máseleler dodalandı.

Atap aytqanda, deputatlar mámleketlik byudjet hám mámleketlik maqsetli qorları byudjetleriniń 2025-jıldıń birinshi yarım jıllıǵındaǵı orınlanıwın dáslepki tárizde kórip shıqtı. Frakciya aǵzaları byudjettiń yarım jıllıq orınlanıwı dawamında ekologiya baǵdarına ajıratılǵan qarjılar hám olardan nátiyjeli paydalanıw jaǵdaylarına ayrıqsha itibar qarattı. Bul baǵdardaǵı ámeliy jumıslar menen birge orınlanıwı támiyinlenbegen wazıypalarǵa toqtap ótildi. Deputatlar frakciyanıń kelesi májilisinde húkimet aǵzaları aldına qoyılatuǵın máselelerdi kelisip aldı.
Bunnan soń májiliste 2025-jıl 29-avgustta qabıl etilgen “Baslamalı byudjet processlerin jetilistiriw sheńberinde xalıq wákilleri hám saylawshılar arasında birge islesiwdi kúsheytiw ilajları haqqında”ǵı Prezident qararınıń áhmiyeti, deputatlar aldında turǵan wazıypalar dodalandı.
Atap ótilgenindey, bul qararǵa bola, 2026-jıl 1-yanvardan deputatlar hár jılı baslamalı byudjet processlerinde tiyisli saylaw okruglerinde jeńimpaz bolmaǵan joybarlar arasınan xalıqtıń kúndelikli turmısı hám aymaqtıń rawajlanıwına tásir etetuǵın 2 joybardı (hár máwsimde birewden) “Ashıq byudjet” málimleme portalında tańlaydı. Bul tańlaw joybardı respublikalıq byudjetten qarjılandırıw ushın tiykar bolıp esaplanadı.
Bul processlerde jeńimpaz bolmaǵan joybarlardı qarjılandırıw ushın hár bir deputatqa 1 jılda 2 máwsimge BEMniń 8 mıń esesi muǵdarında qarjı hár jıllıq respublikalıq byudjette názerde tutıladı.
Frakciya aǵzaları bul jańa sistema baslamalı byudjet procesinde jáne de nátiyjeli ótiwin, orınlarda xalıqtı qıynap kiyatırǵan máselelerdi sheshiwde úlken áhmiyetke iye bolatuǵının atap ótti. Bul baǵdardaǵı jumıslardı alıp barıw mexanizmlerin jaratıw máselesi dodalanıp, bir qatar usınıslar bildirildi.
Sonday-aq, májiliste frakciya aǵzalarınıń 26-28-avgust kúnleri saylaw okruglerindegi jumısınıń juwmaqları da esap-sanaq etildi. Deputatlardıń saylawshılar hám múrájatlar menen islesiw sistemasın bunnan bılay da kúsheytiw boyınsha bir qatar usınıslar berildi.

Muhtarama KOMILOVA,
ÓzA