Búgingi kúnde jámiyettiń rawajlanıwında ruwxıy qádiriyatlar, úrp-ádetler hám milliy dástúrlerdiń ornı sheksiz. Ásirese, toy hám máresimlerdi ıqshamlastırıw, ısırapgershiliktiń aldın alıw, jas áwladtı ruwxıy jaqtan jetik etip tárbiyalaw hám nuranıylardıń turmısta belsene qatnasıwın támiyinlew áhmiyetli máselelerden birine aylanbaqta.

Ellikqala rayonı hákimliginde ótkerilgen májiliste rayon hákimi V.Niyazimbetov, “Nuranıy” qorı Qaraqalpaqstan Respublikası bóliminiń baslıǵı T.Abdijabbarov, rayonnıń belsendi nuranıyları hám tiyisli kárxana hám shólkemlerdiń basshıları qatnastı.
Májiliste toy hám máresimlerdi ıqshamlastırıw, ısırapgershiliktiń aldın alıw, jámiyette ruwxıy tárbiyanı kúsheytiw, jaslarǵa durıs jol kórsetiw sıyaqlı máselelerge ayrıqsha dıqqat qaratıldı. Sonıń ishinde, “Bir nuranıy – on jasqa juwapker” principi tiykarında jaslarǵa ámeliy járdem kórsetiw, olardı aǵartıwshı, watansúyiwshi hám salamat pikirleytuǵın shaxslar etip tárbiyalaw boyınsha sóylesiw ótkerildi.
Sonday-aq, májiliste shólkemlestiriw máselesi de kórip shıǵıldı. Kóp jıllar dawamında “Nuranıy” qorı Ellikqala rayonlıq bóliminiń baslıǵı lawazımında jemisli miynet etken I.Xodjaniyazovtıń xızmetleri ayrıqsha atap ótildi. Ol adam saltanatlı túrde húrmetli kekselik dem alısına shıǵarıldı, – dep maǵlıwmat beredi rayon hákimligi Málimleme xızmeti bólimi.
Jańa tayınlawǵa bola, “Nuraniy” qorı Ellikqala rayonı bóliminiń baslıǵı lawazımına F.Ibadullaev tayınlandı.
Bunday ilajlar arqalı jámiyette kekselerge húrmet, jaslarǵa itibar sıyaqlı iygilikli qádiriyatlar jáne de bekkemlenetuǵını sózsiz.

Qaraqalpaqstan xabar agentligi