Oliy Majlis Senatınıń onınshı jalpı májilisi óz jumısın dawam ettirmekte. Májiliste shıǵıp sóylegen Senat Baslıǵı Tanzila Norboeva segiz jıl aldın Prezidentimiz alǵa qoyǵan Jańa Ózbekstan ideyası xalqımızdı birlestiriwshi, ullı maqset hám úlken sheklerge iytermeleytuǵın milliy ideyaǵa aylanǵanın atap ótti.

Bul ideyanı ámelge asırıw jolındaǵı tınımsız háreketlerdi, ózgeris hám jańalanıwlardı hár birimiz óz aymaǵımız, máhállemiz, ulıwma, turmısımız mısalında kórip turmız.
Keń kólemli dóretiwshilik jumısları: jańa qalalar, jol-transport infrastrukturası obektleri, iri sport obektleri, ilim, mádeniyat hám aǵartıwshılıq orayları xalqımızdıń búgini hám keleshegin abadanlastırıwǵa qaratılǵan.
– Adamlarımız juwapkershilik sezimi menen suwǵarılǵan jańasha pikir, jańasha kózqaras, jańasha arzıw-niyetler menen jasamaqta,-dedi Tanzila Norboeva. – Olardı ámelge asırıw, ulıwma xalqımızdı razı etiw Prezidentimiz basshılıǵındaǵı reformalardıń baslı maqseti. Mine, usı maqset jolında abadanlıq kólemi, rawajlanıw pátleri misli kórilmegen dárejede keńeyip, jedellesip barmaqta.
Keyingi segiz jılda jalpı ishki ónim 2 esege artıp, ótken jılı 115 milliard dollarǵa, eksport kólemi 26 milliard dollarǵa jetken. Jıl aqırına shekem jalpı ishki ónim 130 milliard dollarǵa jetedi. Altın-valyuta rezervleri tariyxta birinshi márte 48 milliard dollardan astı, ótken segiz jılda elimizge derlik 130 milliard dollar sırt el investiciyası kirip kelgen.
Bul kórsetkishler kóp jaǵınan elimizde isbilermenlikti rawajlandırıwǵa qaratılǵan aqılǵa uǵras siyasattıń nátiyjesi ekenin tán alıw kerek.
– Mámleketimiz basshısı ǵárezsizligimizdiń 34 jıllıǵına baǵıshlanǵan saltanatlı máresimdegi shıǵıp sóylegen sózinde Jańa Ózbekstanda isbilermenlik ekonomikanı háreketke keltiriwshi, alǵa baslawshı úlken kúshke aylanǵanın ayrıqsha atap ótti. Jaqında Prezidentimizdiń isbilermenler menen bolǵan ashıqtan-ashıq sóylesiwinde buǵan hámmemiz jáne bir márte isendik. Isbilermenler kóbeyip, júzlegen kárxanalardıń jumısı barǵan sayın keńeyip, rawajlanbaqta. Jumıs orınlarınıń sanı da artpaqta. Usı jıldıń ótken dáwirinde 5 million xalıqtıń bántligi támiyinlendi. Tek ǵana biznesti “sayadan” shıǵarıw boyınsha alıp barılǵan sistemalı ilajlar nátiyjesinde jumıs orınlarınıń sanı 800 mıńnan aslamǵa kóbeygen. Usı jılı jámi 35 milliard dollar investiciya esabınan 9 mıńǵa shamalas jańa kárxana, xızmet kórsetiw kompleksleri qurıladı. Bul degeni, aymaqlarımız jáne de abat boladı, xalıq ushın qolaylı, zamanagóy sharayatlar jaratıladı, mıńlaǵan qosımsha jumıs orınları ashıladı, shańaraqlardıń abadanlıǵı jáne de joqarılaydı, – dedi Senat Baslıǵı.

Norgul Abduraimova, ÓzA