Shańaraq – ómirdiń máńgiligi hám áwladlardıń dawamlılıǵın támiyinleytuǵın qádiriyatlar besigi, keleshek áwladlar ushın biytákirar tárbiya orayı bolıp esaplanadı.

Elimizde shańaraqqa bolǵan itibar ázeliy qádiriyatlar, milliy úrp-ádetler menen tıǵız baylanısqan halda kózge taslanadı. Shańaraq, jámiyet hám mámleket túsinikleri bárqulla únleslikte, birgelikte tilge alınadı.
Mámleketimizde hayal-qızlardıń huqıqın qorǵaw, gender teńlikti támiyinlew, shańaraqtıń bekkemligi ushın hayal-qızlar hám er adamlarǵa teń huqıq jáne imkaniyatlar jaratıwǵa ayrıqsha itibar qaratılıp, bul baǵdarda keń kólemli jumıslar alıp barılmaqta.
Usı maqsette «Salamat shańaraq – salamat jámiyet ushın birleseyik» atamasında oqıw seminarı shólkemlestirildi. Ilajda gender teńligi, shańaraq turaqlılıǵı hám salamat jámiyet qurıw arasındaǵı óz-ara baylanıslılıq keń túrde dodalandı.
Seminarǵa Ózbekstan Respublikası Shańaraq hám hayal-qızlar komitetiniń basqarma baslıǵı Uǵiloy Urazova, Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komitetiniń baslıǵı Maryam Axmedova, sonday-aq, mákeme, shólkem, kárxana hám ministrliklerdiń xızmetkerleri qatnastı. Ushırasıw dawamında hayal-qızlar hám er adamlardıń teń huqıqın támiyinlew, olardıń jámiyetlik turmısta belsene qatnasıwın keńeytiw, shańaraqlıq juwapkershilikti ádil bólistiriw máseleleri dodalandı.
Sonday-aq, shańaraqlıq qádiriyatlardı qásterlep saqlaw, salamat turmıs tárizin qáliplestiriw hám jas áwladtıń tárbiyasında gender teńliginiń ornı haqqında pikir-usınıslar bildirildi. Qánigeler tárepinen qatnasıwshılarǵa huqıqıy, ruwxıy hám medicinalıq jaqtan paydalı usınıslar berildi.
Oqıw seminardıń juwmaǵında gender teńlikti támiyinlew tek ǵana salamat shańaraq emes, al pútkil jámiyettiń rawajlanıwınıń áhmiyetli kepili ekeni túsindirildi. Hár bir puqaranıń teń huqıq hám imkaniyatlardan paydalanıwı, óz potencialın tolıq júzege shıǵarıwı ushın zárúr sharayatlar jaratıw – búgingi kúnniń áhmiyetli wazıypalarınan biri ekenligi atap ótildi.

Qaraqalpaqstan xabar agentligi