Zamanagóy bilimlendiriw sistemasında joqarı oqıw orınları arasındaǵı xalıqaralıq birge islesiw baylanısların keńeytiw, ilimiy hám akademiyalıq tarawlarda tájiriybe almasıw úlken áhmiyetke iye bolmaqta.

X.Dosmuxammedov atındaǵı Atıraw universiteti rektorı, basqarma baslıǵı S.Idrisov Berdaq atındaǵı Qaraqalpaq mámleketlik universiteti Qaraqalpaq filologiyası hám jurnalistika fakulteti dekanı, filologiya ilimleriniń doktorı, professor Q.Turdıbaevtı qabılladı,- dep maǵlıwmat beredi QMU Baspasóz xızmeti.
Ushırasıw dawamında tárepler eki tárepleme birge islesiwdi bekkemlew, bilimlendiriw hám ilim tarawlarında nátiyjeli baylanıslardı jolǵa qoyıw boyınsha pikir alıstı. Atap aytqanda, jurnalistika baǵdarı boyınsha óz-ara tájiriybe almasıw, ilimiy-izertlew jumısların birgelikte alıp barıw, akademiyalıq mobillik sheńberinde studentler hám professor-oqıtıwshılar arasında óz-ara almasıwdı ámelge asırıw sıyaqlı áhmiyetli máseleler dodalaw orayında boldı.
Ulıwma maqsetlerge erisiwde tıǵız birge islesiw áhmiyetli ekeni atap ótilip, keleshekte birgeliktegi konferenciyalar, ilimiy seminarlar hám dóretiwshilik joybarlardı shólkemlestiriw boyınsha kelisimge erisildi.
Ushırasıw juwmaǵında eki universitet arasında xalıqaralıq birge islesiw boyınsha kelisimge qol qoyıldı. Bul sapar etiw hám qol qoyılǵan kelisim tárepler ushın óz-ara tájiriybe, bilim hám ilimiy potencial almasıw jolında bekkem tiykar bolıp xızmet etiwi kútilmekte.

Qaraqalpaqstan xabar agentligi