Franciya Siriyanıń burınǵı Prezidenti Bashar Asad hám jáne altı joqarı mártebeli burınǵı hámeldardı qamaqqa alıwǵa order berdi, dep jazadı “Al-Jazeera”. Qararǵa 2012-jılı Xoms qalası bombalanǵanı hám eki jurnalist qaytıs bolǵanı sebep etip kórsetilgen.

Basılımnıń jazıwınsha, sol waqıya qurbanları – Britaniyanıń “The Sunday Times” gazetasında islegen 56 jasar amerikalı Mari Kolvin hám 28 jasar francuz fotografı Remi Oshlik.
Mámleket rásmiyleri bul hádiyseni adamzatqa qarsı itimallı áskeriy jınayat sıpatında tergemekte. Buyrıq Asadtan tısqarı onıń inisi, Siriya 4-bronlanǵan diviziyasınıń burınǵı basshısı Mohir Asad, razvedka baslıǵı Ali Mamluk hám armiya shtabınıń burınǵı basshısı Ali Ayubqa da tiyisli.
Siriyanıń aldınǵı rásmiyleri Xomstaǵı turaq jay imaratlarınıń bombalawǵa baylanıslılıǵın biykar etken. Jergilikli ǵalaba xabar quralları hám sóz erkinligi orayınıń málim etiwinshe, Franciya sud tergewi hújim waqtında sırt elli jurnalistler qastan nıshanaǵa alınǵanın anıqlaǵan.
– Tergew Bob-Amrdegi rásmiy emes baspasóz orayına etilgen hújim Siriya rejiminiń óziniń jınayıy háreketleriniń sáwleleniwin sheklew, ǵalaba xabar qurallarınıń wákillerin qala yamasa mámleketti taslap ketiwge májbúrlew maqsetinde sırt elli jurnalistlerdi nıshanǵa alıw niyetiniń bir bólegi ekenin anıqladı, – dedi Siriya ǴXQ hám sóz erkinligi orayınıń bas direktorı, huqıqtanıwshı Mazen Darvish.
Parijde jaylasqan Insan huqıqları xalıqaralıq federaciyası (FIDH) da jurnalistler “rejim tárepinen islengen jınayatlardı hújjetlestiriw” ushın qorshalǵan qalaǵa jasırın kirgenin hám “maqsetli bombalaw” qurbanına aylanǵanın atap ótti.
Bashar Asad 2024-jıl dekabr ayında hákimiyattan awdarılǵan, keyin ala shańaraǵı menen Rossiyadan baspana tapqan.

M.Pirmatova, ÓzA