Ózbekstan Respublikası Prezidentiniń 2024-jıl 24-dekabrdegi «2025-2027-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı qararı tiykarında, Taxtakópir rayonı Jańadárya awıl puqaralar jıyını aymaǵındaǵı 19-sanlı ulıwma orta bilim beriw mektebi janında joybar bahası 1 mlrd. 728 mln.sumlıq zamanagóy sport zalı qurılıp, paydalanıwǵa tapsırıldı.

Imarattıń ashılıw máresiminde rayon hákimi Jambul Adilov qatnasıp, awıl xalqın hám mektep jámáátin Ózbekstan Respublikası Ǵárezsizliginiń 34 jıllıǵı hám jańa oqıw jılınıń baslanıwı, jańa sport zaldıń paydalanıwǵa tapsırılıwı menen qutlıqladı. Ilajda sońǵı jılları mámleketimizde húrmetli Prezidentimizdiń basshılıǵında ámelge asırılıp atırǵan iygilikli isler atap ótilip, jańa sport zal awıl jaslarınıń sport penen turaqlı shuǵıllanıwı ushın oray bolatuǵınlıǵı hám olardıń arasınan keleshekte Aziya, jáhán hám Olimpiada chempionları jetilisip shıǵıwına tilekleslik bildirdi.
Saltanatlı máresimde qurılıs jumısların sapalı orınlaǵan «Perspektiva Montaj Nukus» JShJ qurılısshıları rayon hákimliginiń Minnetdarshılıq xatı menen sıylıqlandı.
Álbette, aymaqta sport zaldıń iske túsiriliwi nátiyjesinde mektep oqıwshıları denetárbiyası menen shuǵıllanıwına keń imkaniyatlar jaratılıp, sport dógerekleriniń jumısı jáne de jedellesedi hám bul jaslar arasında salamat turmıs tárizin bekkemlewge xızmet etedi, dep isenemiz.

Adilbay Orazov,
Qaraqalpaqstan xabar agentligi sholıwshısı