Qaraqalpaqstan Respublikası sudında kóp kvartiralı turaq jaylarda jaylasqan turaq jay hám turaq jay emes jaydıń múlk iyeleri, turaq jaydı basqarıw uyımları arasındaǵı qatnasıqlardan kelip shıǵatuǵın kelispewshilikler boyınsha seminar shólkemlestirildi.

Ilajda Puqaralıq isleri boyınsha sudyalar, prokuraturanıń juwapker xızmetkerleri, qurılıs hám turaq jay kommunallıq xojalıǵı ministrligi, sonday-aq, basqarıw servis kompaniyalarınıń basshıları qatnastı.
Seminar dawamında kóp kvartiralı turaq jaylarda júzege keletuǵın huqıqıy kelispewshilikler, olardı óz waqtında sheshiwdiń áhmiyeti, sonıń menen birge, sudlar tárepinen nızamlardıń birdey hám ádil qollanılıwı máseleleri dodalandı.
Ilajda Qaraqalpaqstan Respublikası sudı baslıǵınıń orınbasarı, Puqaralıq isleri boyınsha sudlaw kollegiyasınıń baslıǵı A.Kerimbaev shıǵıp sóylep, Ózbekstan Respublikası Joqarǵı sudınıń baslaması menen tayarlanǵan «Kóp kvartiralı turaq jaylarda jaylasqan turaq jay hám turaq jay emes múlk iyeleri hám turaq jaydı basqarıw uyımları arasındaǵı qatnasıqlardan kelip shıǵatuǵın kelispewshilikler boyınsha» ámeliy qollanbanıń áhmiyetin ayrıqsha atap ótti. Atap ótilgenindey, bul qollanba tarawdaǵı sud ámeliyatın jaqsılaw hám túrli talqılawlardı saplastırıwǵa xızmet etedi.
Seminarda Qaraqalpaqstan Respublikası sudınıń sudyası Zulfiya Babadjanova qatnasıwshılarǵa qollanbanıń áhmiyeti boyınsha keń túsinikler berdi. Sonıń ishinde, múlk iyeleri hám basqarıw uyımları arasındaǵı shártnamalar, olardı dúziw tártipleri, táreplerdiń óz-ara huqıq hám minnetlemeleri, sudlarǵa kimler hám qanday tiykarda múrájat etiwi múmkin ekenligi, arzalardıń úlgileri hám zárúr hújjetler haqqında anıq maǵlıwmatlar berildi. Sonday-aq, sud qárejetleri, mámleketlik bajıdan beriletuǵın jeńillikler, shaǵımlardı qabıllaw, qaytarıw yamasa biykarlaw tiykarları haqqında da pikirler bildirildi.
Seminar juwmaǵında tarawda jol qoyılıp atırǵan kemshilikler, puqaralar tárepinen bildirilip atırǵan orınlı narazılıqlar hám olardı saplastırıw boyınsha ámelge asırılıwı tiyis bolǵan ilajlar boyınsha qatnasıwshılar arasında pikirlesiwler bolıp ótti.

Adilbay Orazov,
Qaraqalpaqstan xabar agentligi sholıwshısı