Búgingi kúni elimizde zaman talabına say bilim alıwı hám kásip-óner iyelewi ushın barlıq qolaylı sharayatlar jaratılǵan. Ózlerine jaratılǵan usınday imkaniyatlardan nátiyjeli paydalanıp kiyatırǵan kópshilik jaslarımız joqarı hám orta arnawlı oqıw orınlarında bilim alıp, xalıq xojalıǵınıń hár qıylı tarawlarında jemisli xızmet etip kelmekte.

Biraq, «bes barmaqtıń birdey bolmaǵanınday» respublikamızdaǵı ayırım jaslarımız jeńil jol menen aqsha tabıwdı oylap, ózleri sezbegen halda jınayat jolına kirip ketpekte.
Biz sóz etpekshi bolǵan, sud materialın oqıp otırıp, erksiz áttegen-ay deymiz…
Endi waqıya boyınsha toqtalatuǵın bolsaq, «tepse temir úzetuǵın» taxtakópirli ǵırıstay eki jigit, yaǵnıy, Tolıbay menen Salamat birewiniń Qazaqstanǵa jumıs islewge ketip baratırǵanın sıltawlap, «jol ashar» sıpatında ekewi araq ishedi. Sońınan olardıń jáne ishkisi kelip, Dáwqara elatında jasawshı tanısı Mansurdıń úyine barıp bul házligin dawam etedi hám óz-ara gúrrińlesiw dawamında Tolıbaydıń satılatuǵın motocikli bar ekenligin esitip, Mansur rayon orayında jasawshı Tolıbaydıń úyine baradı.
Usı waqıt aralıǵında «araqtıń kúshi» ózin kórsetip, «úsh dos» óz-ara jınayıy til biriktirip, Tolıbaydıń qońsısı Abatgúl apanıń eki bas gissar porodalı qoyların urlaydı hám onı avtomashinaǵa tiyep, Qaraózek rayonında jasawshı puqara Ańsatqa shopanlardıń qoyı edi, arzan alıp qal dep 4 mln sumǵa satadı.
Biraq, «aydı etek penen jawıp bolmaydı» degenindey, olardıń islegen bul is-háreketleri erteńine málim bolıp, qoydı bazarda satıp turǵan Ańsat ishki isler bólimi xızmetkerleri tárepinen uslanadı. Jaqında bul «úsh azamat»tıń islegen jınayatlı isi jınayat isleri boyınsha Taxtakópir rayonlıq sudında kórip shıǵılıp, olarǵa nızam tiykarında tiyisli jaza tayınlandı.
«Urlıqtıń túbi …» degen usı bolsa, kerek.

(Maqalada adam atları ózgertilip alındı)

O.Maulenov,
Jınayat isleri boyınsha Taxtakópir rayonlıq sudınıń baslıǵı.
Qaraqalpaqstan xabar agentligi