Pekin qalasında bolıp ótken Ózbekstan-Qıtay sawda-ekonomikalıq hám investiciyalıq forumında eki mámleketten 800 den aslam mámleketlik hám jeke menshik sektor wákilleri qatnastı. Forum sheńberinde sanlı texnologiyalardı rawajlandırıwǵa ayrıqsha itibar qaratıldı. Ilajda IT Park Uzbekistan delegaciyası da qatnasıp, mámlekettiń global IT-xab sıpatındaǵı ornı hám keleshektegi birge islesiw imkaniyatları haqqında maǵlıwmat berdi.

Forumda IT Park Uzbekistan bas direktorı Abdulahad Qwchqorov basshılıǵındaǵı delegaciya da qatnastı. Olar mámlekettiń global IT-xab sıpatındaǵı ornı barǵan sayın joqarılap atırǵanın atap ótti.
Sóylesiwler dawamında IT hám innovaciyalar tarawındaǵı birge islesiwdiń perspektivalı baǵdarları dodalandı. Rásmiy bólim menen bir waqıtta B2B hám G2B ushırasıwları ótkerilip, isbilermenlerge tikkeley baylanıslar ornatıw hám birgeliktegi joybarlardı dodalaw imkaniyatı jaratıldı.
Qıtaylı birge islesiwshiler menen sheriklik IT Park Uzbekistan ushın jańa investiciyalardı tartıw, birgeliktegi bilimlendiriw baslamaların jolǵa qoyıw hám xalıqaralıq birge islesiwshiler tarmaǵın keńeytiw sıyaqlı imkaniyatlardı usınadı. Bul bolsa mámlekettiń texnologiyalıq ekosistemasın rawajlandırıw hám Ózbekstannıń jáhán IT bazarındaǵı ornın bekkemlewde áhmiyetli qádem boladı.

Nigora Rahmonova,
ÓzA