Gaz támiynatı tarawı qánigelerinin tiykarǵı wazıypası hár qanday sharayattada tutınıwshılardı turaqlı túrde tábiyǵıy hám suyıltırılǵan gaz benen turaqlı támiyinlewden ibarat. Sonlıqtan taraw qánigeleri tárepinen házirgi waqıtta gúzgi-qısqı máwsimge tayarlıq kóriw, tutınıwshılarǵa óz waqtında tábiyǵıy hám suyıltırılǵan gaz jetkerip beriwde kelip shıǵıwı múmkin bolǵan mashqalalardıń aldın alıw boyınsha belgilep alınǵan is-reje tiykarında jumıslar alıp barılmaqta.

Atap aytqanda, búgingi kúni respublikamızdıń eń shetki shegaralas aymaqlarınan sanalǵan Taxtakópir rayonındaǵı alıs awıllarda jasawshı tutınıwshılardı suyıltırılǵan gaz ballonları menen támiyinlewge de itibar karatılıp, Múlk, Qostruba, Jańadárya, Karaoy, Qaratereń, Dáwqara, Beltaw, A. Adilov, Końıratkol hám Atakól awıl puqaralar jıyınlarında jasawshı 1 mıń 700 den aslam xojalıqlardı óz waqtında irkinishsiz gaz ballonları menen támiyinlep kelmekte.
Gaz támiynatı tiykarınan Shımbay rayonında jaylasqan «Shımbay gaz toltırıw shaqapshası» arqalı arnawlı avtotransportlarda tasıp jetkerip beriledi.
Gezektegi grafik boyınsha gaz ballonları menen támiyinlew jumısları rayon orayınan 160 km uzaqlıqta jaylasqan Qostruba awılı boldı.
-Hár qanday qıyın sharayatta da jol mashaqatına qaramastan awılda jasawshı 28 xojalıqqa gaz ballonları xár 30-35 kún aralıǵında turaqlı túrde jetkerip berilmekte,-deydi Taxtakópir rayonlık gaz tamiynatı bóliminiń jetekshi kánigesi Erjan Adilov.
Haqıyqatında da, «qıs ǵamıńdı jazda je» degenindey, házirgi kúnleri pútkil respublikamız boylap gúzgi-qısqı máwsimge puqta tayarlıqlar kóriw isleri alıp barılmaqta. Bul bolsa, xalqımızdıń qıstan hesh bir qáwetersiz, aman-esen ótiwine tiykar bolıp xızmet etedi.

Adilbay Orazov,
Qaraqalpaqstan xabar agentligi sholıwshısı